Magen David Azərbaycan – İnsan Hüquqları müdafiəsi və xeyriyyə cəmiyyətinin  sədri, Ümumİsrail Qafqaz Yəhudiləri Asossasiyasinin Azərbaycan nümayəndəliyinin sədri David Seliverstov Vəkillər Kollegiyasının Deontologiya Komitəsinin üzvü, tanınmış vəkil Elvin Əliyevə qarşı aparılan qarayaxma kampaniyası haqda bəyanatla çıxış edib.

Bildirək ki, vəkilə qarşı atılan böhtanla bağlı hüquq-mühafizə orqanlarına müraciətdən sonra onunla bağlı sosial şəbəkələrdə kampaniya daha da şiddətlənib.

Magen David Azərbaycan İnsan Hüquqları Müdafiə Təşkilatının bəyanatında isə vəkilə qarşı aparılan kampaniyanın sifarişlə olduğu bildirilir.

Bəyanatı təqdim edirik:

Biz, Magen David Azərbaycan İnsan Hüquqları Müdafiə Təşkilatı, hüququn aliliyinə, konstitusiya dəyərlərinə və insan ləyaqətinə əsaslanaraq aşağıdakıları rəsmi şəkildə bəyan edirik:

Vəkillərin İntizam Komissiyasının üzvü, Vəkillər Kollegiyasının Deontologiya Komitəsinin üzvü, Magen David Azərbaycan İnsan Hüquqları Müdafiə Təşkilatının Hüquq departamentin rəhbəri  Elvin Əliyev hüququn və şərəfin daşıyıcısıdır.

Elvin Əliyev siyasi sifarişlərin icraçısı deyil, əksinə, vicdanın, şərəfin və hüquqi prinsipiallığın daşıyıcısıdır. O, hüquqi departamentin rəhbəri olaraq təkcə təşkilatın hüquqi müdafiə fəaliyyətinə deyil, həm də Azərbaycan Respublikasında hüququn və ədalətin fəal keşikçisinə çevrilmişdir.

Elvin Əliyev çoxsaylı məhkəmə proseslərində vətəndaş hüquqlarının qorunması, ədalətin bərpası və konstitusiya prinsiplərinin müdafiəsi məqsədilə peşəkar və prinsipial mövqe nümayiş etdirmişdir. Onun fəaliyyəti, hər bir vətəndaşın şərəf və ləyaqətinin toxunulmazlığına dair hüququnun qorunmasına yönəlib.

Elvin Əliyev

Elvin Əliyev eyni zamanda Vəkillər Kollegiyasının Nizam-İntizam Komissiyasının üzvü və vəkillik peşə fəaliyyətinin etik və hüquqi prinsiplərinin fəal müdafiəçisidir. O, vəkil adının hüquqi və mənəvi məsuliyyətini daşıyan şəxslərdən biridir və peşə etikasının qorunmasına töhfə verir.

Elvin Əliyev hüquqi fəaliyyətində Azərbaycan dövlətçiliyinin möhkəmlənməsi, qanunun aliliyinin təmin olunması və Konstitusiyanın prinsiplərinə sadiqlik kimi ali hədəflərə xidmət edir. Onun fəaliyyəti hüququn sadəcə texniki alət deyil, həm də dövlətin mənəvi dayağı olduğunu sübut edir.

Hüquq siyasi sifarişlərə qarşıdır – Azərbaycan hüquqi dövlətdir!

Bir daha qətiyyətlə bəyan edirik:

Azərbaycan Respublikasının qanunları fəaliyyətsiz və simvolik deyil – onlar real hüquqi qüvvəyə malikdir və ədalət prinsiplərinə əsaslanır.

Azərbaycan dövləti və dövlətçiliyi Konstitusiyaya və hüquqa xidmət edir.

Qanunların tətbiqi – yəni hüquqi qiymətləndirmənin aparılması və məhkəməyə verilmə prosesi – dövlətin hüquq normalarına əsaslanaraq öz funksiyasını yerinə yetirməsidir. Bu heç bir halda “siyasi sifariş” kimi təqdim oluna bilməz. Çünki nə sübut var, nə fakta əsas, nə də hüquqi dayaq.

Peşəkar hüquq müdafiəçisi, vəkil və hüquqşünas yalnız və yalnız Azərbaycan Respublikasının Konstitusiyasına, qanunvericiliyinə və sübutlara əsaslanmalıdır.

Heç bir hüquqi əsas olmadan Elvin Əliyevin öz hüquqlarını, şərəf və ləyaqətini və peşə nüfuzunu qorumağa yönəlmiş fəaliyyəti “siyasi sifariş” adlandırıla bilməz.

Bu, hüququn mənəvi nüvəsinə, hüquq müdafiəçiliyi etikasına və vəkillik peşəsinin prinsiplərinə ziddir.

Yekun olaraq bildiririk ki, Elvin Əliyev yalnız bir vəkil deyil. O, qanunun aliliyini peşəsində yaşadan, insan hüquqlarını fəal qoruyan, dövlətin hüquqi sütunlarını möhkəmləndirən bir hüquqşünasdır. Onun fəaliyyəti sübut edir ki:

Hüquq, heç vaxt siyasi manipulyasiyaya tabe olmur.

Hüquq – faktla danışar, sübutla hərəkət edər, ədalətlə qərar verər.

Peşəkar vəkil – susmaz, qorxmaz, haqqın yanında durmağı şərəf bilər”.