İranın yeni prezidenti Məsud Pezeşkian and içib

İyulun 30-da İran parlamentində bir çox xarici dövlət rəsmilərinin iştirakı ilə İranın yeni prezidenti Məsud Pezeşkianın andiçmə mərasimi keçirlib.
“Mehr” Agentliyi xəbər verir ki, mərasimə 600-ə yaxın xarici və iranlı jurnalist buraxılıb.
Tədbirdə70-dən çox xarici nümayəndə, o cümlədən dövlət rəsmiləri iştirak edib.
Parlamentin sədri Məhəmməd Bağer Qalibaf mərasimin əvvəlində çıxış etdikdən sonra 69 yaşlı Pezeşkian müqəddəs Qurana and içib.
Konstitusiyanın 121-ci maddəsinə əsasən and içən Pezeçkian bildirib ki, üzərinə götürdüyü vəzifələri yerinə yetirmək üçün bütün istedad və bacarığından istifadə edəcək.
“Prezident kimi “Qurani-Kərim” və İran xalqı qarşısında uca Allaha and içirəm ki, İslam Respublikasının rəsmi din və quruluşunun və ölkə Konstitusiyasının keşikçisi olacağam və bütün istedad və bacarıqlarımı üzərimə götürdüyüm vəzifələri yerinə yetirmək üçün sərf edəcəyəm. Özümü xalqa xidmət etməyə və ölkəni yüksəltməyə, dini və əxlaqı təbliğ etməyə, haqqı dəstəkləməyə, ədaləti genişləndirməyə, fərdlərin azadlıq və ləyaqətini və Konstitusiyanın millət üçün tanıdığı hüquqları dəstəkləməyə həsr edəcəyəm.
Sərhədlərin və ölkənin siyasi, iqtisadi və mədəni müstəqilliyinin qorunmasında heç bir addım atmaqdan çəkinməyəcəyəm…”, – Pezeşkian deyib.

İranın yeni prezidentinin andiçmə mərasimindən sonra etimad səsverməsi üçün parlamentə öz kabinetini təqdim etmək üçün 15 gün vaxtı var.

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP