Yaxın Şərqdə hasilatın azalacağı təhlükəsi neftin qiymətlərini artırır
Bazar ertəsi İsrail və Qəzzadakı vəziyyətin Yaxın Şərqdə hasilatı azaldacağı ilə bağlı narahatlıq fonunda xam neftin qiymətləri 4 faiz bahalaşıb.
“Bloomberg” agentliyi xəbər verir ki, ABŞ nefti üçün etalon olan “West Texas Intermediate” (WTI) bir barrel üçün 86 dollardan çox bahalaşıb. Erkən Asiya ticarətində “Brent” markalı neftin qiyməti də artıb.
İsrail və Fələstin əraziləri neft istehsalçısı deyil. Lakin Yaxın Şərq regionu qlobal tədarükün demək olar ki, üçdəbirini təşkil edir. “Həmas” silahlı qruplaşmasının şənbə günü başlatdığı hücumlar dalğası iki tərəf arasında onilliklər ərzində ən böyük eskalasiya olub.
Enerji üzrə analitik Saul Kavonik BBC-yə deyib: “Neft üzrə risk amilləri İran və Səudiyyə Ərəbistanı kimi yaxınlıqdakı böyük neft hasilatçısı ölkələrə yayıla biləcək daha geniş bir yanğın perspektivi səbəbindən artır. Əgər münaqişə “Həmas” hücumlarını dəstəkləməkdə ittiham olunan İranı əhatə edərsə, qlobal neft tədarükünün 3 faizi risk altında olacaq”.
Ekspertin sözlərinə görə, münaqişənin qızışacağı təqdirdə, qlobal neft tədarükünün təxminən beşdəbiri “təhlükə altında” olacaq, eyni zamanda, Hörmüz boğazından keçən mühüm neft ticarəti marşrutu fəaliyyətini dayandıracaq.
Hörmüz boğazı iqtisadiyyatları neft və qaz hasilatı üzərində qurulan Körfəz regionunda əsas neft ixracatçıları üçün həlledici əhəmiyyətə malikdir.
HSBC bankından Ceyms Çeo bildirib ki, hadisələrin yaxın günlərdə necə inkişaf edəcəyi ilə bağlı qeyri-müəyyənlik ABŞ Xəzinədarlıq istiqrazlarına və investorların ənənəvi olaraq böhran zamanı satın aldıqları dollara sərmayənin həcmini artıra bilər. “İndiki mərhələdə bir az əsəbi mühit var. İnvestorlar iqtisadi məlumatlar və geosiyasi qeyri-müəyyənliklə bağlı inkişaflar üzrə vəziyyətin daha aydın olmasını istəyirlər”, -deyə bankın Cənub-Şərqi Asiya və Hindistan üzrə baş investisiya direktoru Çeo əlavə edib.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP