OPEC-in baş katibi Haitam Al Qais bildirib ki, neft-qaz sektoruna kifayət qədər sərmayə qoyulmaması uzunmüddətli perspektivdə bazar dəyişkənliyinə və təhlükənin artmasına səbəb ola bilər. O, həmçinin qeyd edib ki, bir enerji növünü digəri ilə əvəz etməkdənsə, istixana qazı emissiyalarının azaldılmasına diqqət yetirmək daha doğru olardı. “Gələcəkdə qlobal neft-qaz bazarlarında sabitliyi təmin etmək, tədarüklər ilə bağlı problemlərin qarşısını almaq məqsədilə bütün enerji sektorlarına böyük investisiyaların qoyulmasına ehtiyac var”, -deyə baş katib vurğulayıb.

Al Qais Dubayda keçirilən Yaxın Şərq Neft və Qaz Konfransında deyib: “Bu, danılmaz həqiqətdir. OPEC-in hesablamalarına görə, uzunmüddətli perspektivdə artan neft tələbatını qarşılamaq üçün dünyanın 12,1 trilyon dollar investisiyaya ehtiyacı var”.

“FGE Consultancy” firmasının sədri Fereidun Feşaraki isə konfransdakı çıxışında bildirib ki, qlobal neft tələbatının sutkada 8 milyon barel ətrafında artımı ilə dünya tədarük problemi ilə üzləşə bilər, çünki Qərbin Rusiya neftinə qarşı sanksiyaları hasilat artımını məhdudlaşdırır. Onun sözlərinə görə, Rusiya hasilatı sutkada 10-11 milyon barel səviyyəsində saxlaya bilər, lakin tətbiq olunan sanksiyalar fonunda gələcəkdə 2 milyon barel artımın davam etməsi ehtimalı azdır.

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP