“Türkdilli dövlətlər bir-biri ilə güc-birlik olmalıdır” – Qeyrət Məcid

Müsahibimiz Özbəkistan Yazıçılar Birliyinin müdir müavini, şair Qeyrət Məciddir.
Daha çox sevgi, vətən və fəlsəfi ruhda şeirlər yazan şairin Olaylar.az-a müsahibəsini təqdim edirik.

– Haqqınızda qısa bir tanışlıq apardım və şeir yazdığınızı gördüm. Həm şeir yazıb, həm məmur kimi çalışmaq sizə çətin deyil? Daha çox şairsiniz, yoxsa məmur?
– İlk öncə demək istəyirəm ki, Özbəkistan və Azərbaycan qardaş ölkədir. Dili, dini, arzu və niyyətləri də bir olan qardaşdır. Azərbaycanın dahi şairləri Nizami Gəncəvi, Nəsimi, Füzuli Özbəkistanda çox sevilən şairlərdir.
Mən Yazıçılar Birliyində müdir müavini kimi çalışıram. Eyni zamanda şairəm, şeirlər yazıram. Məmur olmaqdan daha çox şairəm.
– Bilirsiniz ki, Azərbaycan 44 günlük Vətən müharibəsi ərzində tarixi ərazilərini işğaldan azad etdi. Bu mövzu özbək ədəbiyyatında əks olunubmu?
– Hazırda elə bir əsər yoxdur, amma olmasını istəyirəm. Mən özüm işğaldan azad olunmuş ərazilərdə olmuşam. Şuşaya getdim, ora dağlar ölkəsidir. Orda hər yer viran olub, dağıdılıb. Amma mən Azərbaycanın zəfərindən çox xoşbəxt oldum.
– Sizcə, Böyük Türk Dünyasının və ortaq türk dilinin, Avropa Birliyi kimi Turan Birliyinin də yaranması üçün türk dövlətləri hansı işlər görməlidir?
– Türkdilli Dövlətlər Birliyi var ki, tərkibində Türkiyə, Azərbaycan,Özbəkistan, Qazaxıstan və başqa türkdilli ölkələr var. Bizdə türkdilli dövlətlərə həsr olunmuş kitablar hazırlanıb. Orda Azərbaycan ədiblərindən Nəsimi, Nizami, Füzuli, Hüseyn Cavid, Anar müəllim də var.
Türkdilli dövlətlər bir-biri ilə güc-birlik olmalıdır. Birləşsələr, qüvvətli olacaqlar. Güc birlikdədir. Əmir Teymur deyir ki, güc ədalətdədir. Biz də ədaləti tapsaq, birdəmlik, ədalət taparıq.
– Sizcə, bu birləşməyə hansı faktorlar əngəl olur?
– Ən birinci növbədə yazarlar, şairlər birləşməlidir. Azərbaycan yazarlarının əsərləri özbək dilinə, özbək yazarların əsərləri Azərbaycan dilinə tərcümə edilməlidir. Bunların nəticəsi olaraq xalqlar, dövlətlər dost olar, birləşər. Ən birinci yazarlar, şairlər, jurnalistlər  dost olmalıdırlar.

Röyalə Xəyal

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin:    0 55 4 61 71 21 WHATSAPP