Qarabağ toponimləri tədqiqata cəlb olunub
Müstəqillik illərində ulu öndər Heydər Əliyevin həyata keçirdiyi dövlət quruculuğu məsələlərində dil siyasəti aparıcı rol oynayıb. Ümummilli Liderin təşəbbüsü ilə hələ 1973-cü ildə İmadəddin Nəsiminin 600 illik yubileyi beynəlxalq miqyasda qeyd edilib. Məhz o vaxtdan etibarən Nəsimi yaradıcılığı Azərbaycan və dünya mədəniyyəti miqyasında bir daha tanıdılıb. Dövlət müstəqilliyimizin başlıca rəmzlərindən olan Azərbaycan dilinə qayğı Prezident İlham Əliyevin imzaladığı bir sıra sərəncamlarda öz ifadəsini tapıb. Prezidentin 2013-cü il 9 aprel tarixli Sərəncamı ilə təsdiq edilmiş “Azərbaycan dilinin qloballaşma şəraitində zamanın tələbələrinə uyğun istifadəsinə və ölkədə dilçiliyin inkişafına dair Dövlət Proqramı” ana dilimizin hərtərəfli inkişafı və tətbiqi baxımından böyük əhəmiyyət daşıyır. Həmçinin Azərbaycan dilinin elektron məkanda daha geniş istifadəsinin təmin edilməsilə bağlı bir sıra tədbirlər haqqında və Dövlət Dil Komissiyasının yanında Monitorinq Mərkəzinin yaradılması ilə bağlı sərəncamlar ölkəmizdə dövlət dilinin daim diqqət mərkəzində saxlanıldığını bir daha təsdiq edir.
Bu fikirləri Nəsimi adına Dilçilik İnstitutunun mətbuat xidmətinin rəhbəri, filologiya üzrə fəlsəfə doktoru, dosent Təranə Şükürlü deyib.
O bildirib ki, ölkəmizdə elm və mədəniyyət inkişaf etdikcə Azərbaycan dili daha da zənginləşir, analitik düşüncənin dilinə çevrilir.
“Biz torpaqlarımızla yanaşı, həm də milli mədəniyyət abidələrimizi işğaldan azad etmişik. Ona görə də dilimizin bir sıra sahələrinin öyrənilməsi bu gün aktuallıq kəsb edir. İşğal dövründə Qarabağda xalqımıza məxsus 300-dən çox toponim dəyişdirilib. Toponimlərin tədqiq edilməsi ən mühüm vəzifələrdəndir”, – deyə alim bildirib.
T.Şükürlü qeyd edib ki, Dilçilik İnstitutunda yeni yaradılan Toponimika sektorunda Qarabağ toponimləri tədqiqata cəlb olunub. Bölgədəki toponimlər, oykonimlər, hidronimlər, oronimlər sistemli şəkildə araşdırılır. Toponimlərin mənşəyi, orfoqrafiya məsələləri tədqiqatın əsas istiqamətlərindən biridir. Bununla yanaşı, Azərbaycan dialektologiyası şöbəsində “Qarabağ dialektoloji atlası” çapa hazırlanır.
Qarabağ dialekt, ləhcə və şivələrinin yenidən öyrənilməsi, toplanılması, onların elektron atlaslar, xəritələr şəklində hazırlanması dilçilik elminin əsas vəzifələrindən biridir. İşğaldan azad edilmiş ərazilərdə təbiət leksikasının öyrənilməsi də mühüm vəzifələrdən biridir. Burada olan nadir bitkilərin adları, etimologiyası sistemli tədqiq olunmalıdır. Çünki Qarabağda elə nadir bitki və ağac növlərinə rast gəlmək mümkündür ki, onların elmi cəhətdən araşdırılması məqsədəuyğundur.
Maraqlı xəbərləri Mediazona.az Facebook səhifəmizdən izləyin.
—————————————————————————————————————————————————
DİQQƏT! Şikayət və təklifləriniz, gördüyünüz ve eşitdiyiniz hər hansı bir maraqlı məlumatı bu nömrəyə göndərin 055 461 71 21 WHATSAPP