Aydın Quliyev – 60 – Təbrik edirəm!
Yunus Oğuz
yazıçı, publisist
Müdrik olmaq üçün bəzən yaşın, ömrün, illərin fərqi olmur. İnsan bəzən iyirmi yaşında da altmış yaşındakı kimi müdrik, ağıllı, kamil ola bilir. Bu isə onun yaşadığı həyatdan, başına gələn hadisələrdən, yaşadığı dövrdən, onun ictimai-siyasi vəziyyətindən asılıdır. Bu mənada dostum və çox böyük dostum, uzun illərin sirdaşı, “Bakı Xəbər” qəzetinin baş redaktoru, peşəkar politoloq Aydın Quliyevin altmış yaşı hələ uzun illər bundan əvvəl, bəlkə də qırx il, əlli il bundan əvvəl olub. Və bu gün Aydın Quliyevin “altmış yaşı tamam olur” deyə eşidəndə bizə qəribə gəlir. Çünki biz onun altmış yaşını, yəni müdriklik yaşını, kamillik yaşını çoxdan qeyd etmişik.
Aydın Quliyev ölkənin ictimai-siyasi həyatında, media cəmiyyətində sözünü deyən, özünün dəyişməz dəsti-xətti olan bir qəzetin, bir media orqanının rəhbəridir, baş redaktorudur və həmin media orqanı, həmin qəzet mətbuat aləminə daxil olan gündən bu günə qədər prinsiplərinə sadiq qalıb, tutduğu yoldan dönməyib. Çünki Aydın Quliyev dönməzdir, prinsiplərinə sadiqdir. Aydın Quliyev ictimai-siyasi proseslərə, dövrün hadisələrinə özünün orijinal baxışı olan bir insandır və həmin hadisələrə baxışını, münasibətini bildirəndə özünün iç prinsipindən, dövlətçilik prinsipindən, millətçilik prinsipindən və vətən prinsipindən geri çəkilməz. Bu mənada Aydın Quliyev tanındığı bütün cameədə, çalışdığı bütün sahələrdə böyük hörmət qazanıb və mən dostumun bu böyük, bu gözəl keyfiyyətlərilə qürur duyuram. Mən Aydın Quliyevi həyatımın ən dəyərli insanı sayıram. Aydın Quliyevi medianın ən dəyərli baş redaktoru sayıram. Aydın Quliyevi bizim siyasi həyatımızın ən dəyərli siyasi icmalçısı sayıram və hesab edirəm ki, Aydın Quliyevin hər hansı bir sahə üzrə verdiyi proqnozlar, təhlillər həm özünü doğruldur, həm də kifayət qədər dərindir, düşündürücüdür, həmin proqnozlara, təhlillərə qulaq asmaq mütləqdir, gərəkdir.
Aydın Quliyev həm də çox gözəl dostdur. Şad gündə, dar gündə insanın yanında olan bir dostdur. Altmış yaşı olsa da mən Aydın Quliyevi həm müdrik, həm də çox gənc bilirəm. Çünki Aydın Quliyevin iç dünyasında bir gənc yatıb və Aydın Quliyev nə qədər yaşa dolsa da, nə qədər uzun bir həyat sürsə də içindəki on beş yaşlı, on altı yaşlı saf, gənc oğlan həmişə yaşayır və mən hesab edirəm ki, həmişə yaşayacaq. Aydın Quliyev dediyim kimi çox gözəl bir dostdur, çox sadiq bir insandır. Aydın Quliyev insanın əhvalını, psixoloji durumunu onun səsindən bilər, onun gözlərinə baxarkən bilər və Aydın Quliyevə heç nəyi ətraflı danışmağa ehtiyac yoxdur. O insanı bircə baxışı ilə oxuyar və hansı əhval-ruhiyyədə olduğunu duyar. Bu mənada Aydın Quliyev əvəzsiz bir dostdur, gözəl bir insandır, gözəl media işçisidir və peşəkar, belə deyək, çox ağıllı bir siyasətçidir. Aydın Quliyevi altmış yaşı münasibətilə təbrik edirəm və dediyim bütün sahələrdə olduğu kimi qalmasını arzu edirəm.
Maraqlı xəbərləri Mediazona.az Facebook səhifəmizdən izləyin.
—————————————————————————————————————————————————
DİQQƏT! Şikayət və təklifləriniz, gördüyünüz ve eşitdiyiniz hər hansı bir maraqlı məlumatı bu nömrəyə göndərin 055 461 71 21 WHATSAPP