Sabunçu birinci seçki dairəsinin bütün məntəqələrində səsvermə prosesi demokratik qaydada davam edir. Sabunçu birinci seçki dairəsi dairə seçki komissiyasının sədri Hacı Əliyev 50 min 435 seçicisi olan dairə seçki komissiyasının ərazisində 37 daimi seçki məntəqəsinin fəaliyyət göstərdiyini bildirib.
Qeyd edib ki, məntəqələrin 10-da veb-kameralar quraşdırılıb. Seçki məntəqələrində komissiya üzvlərinin və müşahidəçilərin normal fəaliyyəti, seçicilərin öz səslərini sərbəst şəkildə həyata keçirmələri üçün hər cür şərait yaradılıb.
Qeyd olunub ki, bu il Sabunçu birinci seçki dairəsi üzrə 202 gənc ilk dəfə səs verir. Həmin gənclər səsvermə prosesi ilə bağlı ətraflı məlumatlandırılıblar. Fiziki imkanları məhdud vətəndaşların səs vermələri üçün 10 daşınan seçki qutusu müraciətlər əsasında ünvanlara çatdırılır. Həmçinin sərbəst hərəkət imkanı məhdud olan bir əlil öz istəyi ilə seçki məntəqəsində səs verməsi üçün əlil arabası ilə təmin edilib. Sabunçu birinci seçki dairəsində qeydiyyatda olan seçicilərdən 117-si öz ərizələrinə əsasən, başqa məntəqələrdə səs vermək üçün qeydiyyatdan çıxarılıb.
Səsvermə prosesi 27 saylı Sabunçu ikinci və 28 saylı Sabunçu üçüncü seçki dairələri dairə seçki komissiyalarının məntəqələrində də şəffaf və demokratik şəraitdə davam edir.
