Xocalı soyqırımının 26-cı ildönümü ilə əlaqədar Azərbaycanın Misirdəki səfirliyinin və burada fəaliyyət göstərən “Vətənpərvər” diaspor təşkilatları birliyinin təşkilatçılığı ilə silsilə tədbirlər keçirilib.

Azərbaycanın Qahirədəki səfirliyində təşkil edən anım tədbirində çıxış edən səfir Tural Rzayev 26 il bundan əvvəl Xocalıda mülki əhaliyə qarşı erməni ordusu və onların havadarları tərəfindən törədilən soyqırımından söhbət açıb. O Xocalı soyqırımına ilk siyasi qiymətin Azərbaycan xalqının ümumilli lideri Heydər Əliyev tərəfindən verildiyini bildirib. Dünyada mövcud olan ikili standartlardan söhbət açan səfir, Xocalı soyqırımını törədən qatillərin hələ də cəzasız qaldığını təəssüf hissi ilə vurğulayıb.

Misirdəki Azərbaycan diasporunun rəhbəri Seymur Nəsirov gənclərimizi sosial şəbəkələrdən daha fəal istifadə etməyə və Xocalı soyqırımı ilə bağlı materialları yaymağı tövsiyə edib. O, eyni zamanda gəncləri Heydər Əliyev Fondunun vitse-prezidenti Leyla Əliyevanın təşəbbüsü ilə uğurla həyata keçirilən “Xocalıya ədalət!” kampaniyasında daha fəal iştiraka çağırdı.

Sonra tədbir iştirakçıları Xocalı soyqırımı ilə əlaqədar səfirlikdə təşkil olunan fotosərgi ilə tanış olub, sənədli filmə baxıblar.

Xocalı soyqırımı ilə əlaqədar Azərbaycan Respublikası Ombudsmanı, Xarici İşlər Nazirliyi və Baş Prokurorluğunun bəyanatları Misirin Xarici İşlər Nazirliyi, Parlamenti və digər təşkilatlara göndərildi.