Dövlət Gömrük Komitəsi GPS elektron kilidlərinin daha səmərəli istismarı ilə bağlı İsrail təcrübəsini öyrənir.

Dövlət Gömrük Komitəsinin (DGK) mətbuat xidmətindən AZƏRTAC-a bildiriblər ki, DGK Gömrük Risklərinin Təhlili və Audit İdarəsinin rəisi, gömrük xidməti polkovniki Faiq Seyidov və həmin idarənin rəis müavini Razim Zamanov Tel-Əvivə səfərdə olublar.

İsrailə səfərin məqsədi bu ölkədə GPS – elektron nəzarət və izləmə sisteminin iş prinsipləri ilə tanışlıq, eləcə də GPS elektron kilidlərinin yeni modelləri ilə bağlı danışıqlar aparmaq olub.

Azərbaycan Respublikasının gömrük ərazisində 2013-cü ilin oktyabrından GPS elektron kilidlərindən istifadə olunur. Yük daşıyan nəqliyyat vasitələrinin yük yerləri Dövlət Gömrük Komitəsinin mobil gömrük bölmələri tərəfindən GPS elektron kilidləri ilə bağlanır. Məqsəd iki gömrük orqanı arasında malların daşınmasının, həmçinin nəqliyyat vasitələrinin hərəkətinin müəyyən olunmuş marşrut üzrə və müddət ərzində başa çatdırılmasına nəzarət etməkdir. Bununla, eyni zamanda, təhlükəsizlik təmin edilir və hüquqpozma hallarının qarşısı alınır.

Səfər zamanı Azərbaycan təmsilçiləri “Beniş GPS” şirkətinin rəhbərliyi və mütəxəssisləri ilə görüşdə GPS elektron kilidlərinin daha səmərəli istismarı və istismar müddətində yaranan problemlərin həlli ilə bağlı təkliflər verib və müzakirələr aparıb.

İsrail Gömrük Xidmətinin rəhbəri Avi Arditi ilə görüşdə iki ölkənin gömrük xidmətlərinin qarşılıqlı münasibətlərindən və perspektivlərdən bəhs edilib, əməkdaşlığın dərinləşdirilməsi üçün qarşılıqlı fəaliyyətin və təcrübə mübadiləsinin önəmi vurğulanıb.

Görüşdə qarşılıqlı maraq doğuran məsələlər ətrafında fikir mübadiləsi aparılıb.