“İsraillə əlaqələri kəsin!” – Ruhanidən ÇAĞIRIŞ

İran prezidenti Həsən Ruhani müsəlmanları İsraillə əlaqələri kəsməyə çağırıb.

İran lideri bölgədə İsraillə münasibətləri normallaşdırmaq istiqamətində bir aktivliyin olduğunu deyib.

Həsən Ruhani ad çəkmədən Səudiyyə Ərəbistanını tənqid edib.

“Bölgədəki bəzi müsəlman ölkələri birmənalı şəkildə sionist rejimlə yaxınlığını açıqladılar. Əminəm ki, müsəlmanları bu şeytani oyunun meyvə verməsinə icazə verməyəcəklər”, – prezident dövlət televiziyası ilə çıxışında bildirib.

Xatırladaq ki, ötən ay israilli nazirlərdən biri Təl-Əvivin Ər-Riyadla İran mövzusunda danışıqlar apardığını söyləyib. Səudiyyə Ərəbistanı bu bəyanata açıq şəkildə cavab verməyib. Ər-Riyadın rəsmi mövqeyi bundan ibarətdir ki, İsraillə münasibətlərin qurulması 1967-ci ildə işğal etdiyi Fələstin torpaqlarının azad edilməsindən asılıdır.