Gözün buynuz qişasının transplantasiyası ölkəmizdə mümkün olacaq

Akademik Zərifə Əliyeva adına Milli Oftalmologiya Mərkəzində Azərbaycana gözün buynuz qişasının gətirilməsi ilə bağlı brifinq keçirilir.

AZƏRTAC xəbər verir ki, tədbirdə çıxış edən mərkəzin uşaqlarda gözün patologiyası şöbəsinin müdiri, tibb üzrə fəlsəfə doktoru Fərəh Abduləliyeva ölkədə üç mindən artıq xəstənin bu əməliyyatın icrasını gözlədiyini bildirib. Bunların təxmini 20 faizi uşaqlardır: “Milli oftalmologiya mərkəzi olaraq biz uzun illərdir ki, bu əməliyyatın ölkəmizdə icra olunmasına dövlətimiz tərəfindən icazə verilməsini arzu edirdik. Bir neçə gün bundan əvvəl Prezident İlham Əliyevin Azərbaycanda keratoplastika əməliyyatının aparılmasına və lazımi donor materialının respublikamıza gətirilməsinə dair Fərman imzalayıb. Biz həkimlər bu humanist addımdan faydalanaraq görmə qabiliyyətini itirmiş insanlara yenidən işıq bəxş edərək, onları fəal həyata qaytara bilərik.

Buynuz qişalarının İran, ABŞ və Rusiyadan gətirilməsi nəzərdə tutulur. Həmin ölkələrin donor bankları ilə danışıqlar aparılıb, razılıq əldə olunub. Hazırda sənədləşdirmə işləri aparılır və yaxın bir neçə həftə ərzində Azərbaycana gözün buynuz qişası gətiriləcək. İlk mərhələdə bu əməliyyat təcili ehtiyacı olanlara icra olunacaq”.