İstanbulda tarixi erməni cinayətlərini ifşa edən yazıçının “imza günü” keçirilib

İstanbuldakı TÜYAP sərgi mərkəzində 36-cı Türkiyə Beynəlxalq Kitab Sərgisi çərçivəsində türkiyəli tanınmış yazıçı və tərcüməçi Mətin Yıldırımın “imza günü” keçirilib.

AZƏRTAC xəbər verir ki, “imza günü”ndə yazıçının “Taleyimi ermənilər yazdı!” silsiləsindən –“Ölümün əks tərəfi” və “Nora ilə Şir Məhəmməd” əsərləri oxuculara təqdim edilib.

Hər iki əsər Birinci Dünya müharibəsindən sonra erməni silahlı birləşmələrinin Türkiyənin şərqində, indiki İran İslam Respublikasının Qərbi və Şərqi Azərbaycan vilayətlərində, o cümlədən Azərbaycanın Naxçıvan bölgəsində törətdikləri soyqırımlardan bəhs edir. Müəllif, eyni zamanda, Azərbaycan Xalq Cümhuriyyətinin qurulması, 1918-ci ildə Bakının erməni-daşnak silahlı birləşmələrindən azad olunması məsələlərinə aid tarixi faktları da obrazlı şəkildə oxuculara çatdırır. Yazıçı hər iki əsərdə böyük ədəbi ustalıqla erməni terror təşkilatlarının fəaliyyəti və genişlənməsi, onların sıravi erməniləri öz təsir dairəsində saxlamaq üçün tətbiq etdiyi amansız üsullar, Azərbaycan və türklərə qarşı həyata keçirdikləri hiyləgərlikləri və silahlı cinayətləri incə çalarlarla oxucuya çatdırmağa nail ola bilib.