Müxalifətin mühacirlərin siyahısını açıqlamamasının pərdəarxası

Bəxtiyar Sadıqov: “Bu məsələdə iqtidar da, müxalifət də yekdil olmalıdır”

Avropaya üz tutan azərbaycanlı mühacirlər məsələsi yenidən gündəmə qayıdıb. Almaniyada yaşayan mühacir, “Legat” inteqrasiya mərkəzinin rəhbəri, tanınmış hüquqşünas Əlövsət Əliyevin son müsahibəsi bir sıra mətləblərin üstünü açmaqla yanaşı, bəzi məsələləri də aktuallaşdırıb.

Belə ki, ölkə daxilindəki siyasi partiyaların getdikcə mühacir biznesi alverini gücləndirdiyi görünür. İnsanlara saxta partiya bileti, arayışı düzəldərək, onları Avropaya yola salan partiyalar haqda artıq ölkənin tanınmış simaları da öz mövqelərini ifadə etməyə başlayıblar. Son olaraq, Böyük Quruluş Partiyasının sədri, deputat Fazil Mustafanın Almaniyadakı iki mühacirlə bağlı sosial şəbəkədə paylaşdığı status diqqət çəkib.

Zaman-zaman bu cür məsələlər aktuallaşan kimi əsas tələblərdən biri ittihamları qəbul etməyən partiyaların Avropadakı mühacirlərinin siyahısı ilə bağlı olub. Lakin indiyədək mühacir alverində adı keçən heç bir siyasi qurum mühacir üzvləri barədə konkret siyahı açıqlamayıb.

İqtidaryönlü deputat, “Azərbaycan” qəzetinin baş redaktoru Bəxtiyar Sadıqov bəzi partiyaların həqiqətən saxta sənədlər yolu ilə insanları xaricə göndərdiklərini dedi: “Xaricə gedib mühacir statusu ilə yaşamaq istəyən insanlara bəzi partiyalar saxta sənədlər veriblər. Düzdür, bəzən partiya rəhbərləri bu cür ittihamları qəbul etməyiblər. Amma internetdə, qəzet səhifələrində gözümüzlə gördüklərimizə nə deyək? Bu halın olması faktdır. Bunlar anti-Azərbaycan şəbəkəsinə xidmət edən və ondan bəhrələnən insanlardır. Onlar üçün hansı müxalif partiyada olmağın önəmi yoxdur. Onlar xaricə gedib Azərbaycan əleyhinə tədbirlərdə iştirak edirlər, dövlətimizin imicinə zərbə vururlar, xüsusilə Dağlıq Qarabağ məsələsinin həlli istiqamətində qəbul edilən hər hansı qərar, yaxud qəbul ediləcək qərar ərəfəsində dövlətimizin əleyhinə fəaliyyət göstərir, çıxışlar edirlər. Bütün bunlar onu göstərir ki, onlar anti-Azərbaycan şəbəkəsinin üzvləridir. Əgər sən burada müxalifət partiyasının üzvüsənsə, gedib xaricdə yaşayırsansa, sənin iqtidarla nə mübarizən? Müxalifət adətən hakimiyyətə gəlmək uğrunda mübarizə aparır, bu yöndə qanuni, yaxud qanunsuz fəaliyyət aparır, şər-böhtanlardan istifadə edir və bu yolla çalışır ki, xalqın gözündən iqtidarı salsın. Bu qəbul olunmayan siyasi vasitə olsa da, bütövlükdə müxalifətin hakimiyyət uğurundakı mübarizəsi başadüşüləndir. Bunlar dövlətin daxilində olmalıdır. Hər hansı bir siyasi partiyanın üzvüsən, bu yolla xaricə getmisən, bəs xaricdən niyə iqtidar əleyhinə şər-böhtan xarakterli mübarizə aparırsan? Xaricdən iqtidara gəlmək olmur axı.

Deməli, sən o partiyada olanda da anti-Azərbaycan şəbəkəsinə xidmət etmisən. Bu mənada o insanlar istər saxta, istərsə də “Beşinci kolon”un üzvü kimi xaricə getsinlər, onların orada Azərbaycan əleyhinə aksiyalarda iştirak etməsini, dövləti gözdən salmaq üçün bütün çirkin əməllərə əl atmasını ilk növbədə bir vətəndaş kimi qəbul etmirəm, əslində xəyanətkar mövqe sayıram. Belə insanları tək iqtidar deyil, həmin müxalifət partiyalarının özləri də ifşa etməlidir. Həmin partiyalar da bu cür xəyanətkarlardan imtina etməlidir. Deməlidirlər ki, əgər gedib orada milli məsələlərlə bağlı gedən müzakirələrdə dövlət əleyhinə olursunuzsa, çıxış edirsinizsə, biz də sizi keçmiş üzvümüz kimi qınayırıq. Belə olduqda aparılan mübarizə də anlaşılar, müxalifətin sıralarında saflığı qorumaq istəkləri görünər. Biz biznes alverçilərinə qarşı mübarizəni iqtidar olaraq zəiflətmirik. Gedib onları ifşa edəndə, bununla bağlı sərt tədbirlər görüləndə belə anlaşılır ki, onlardan qorxuruq, onların dedikləri haqdır. Bizim üçün onlar anti-Azərbaycan şəbəkəsinin üzvüdürlər. Onları azərbaycanlı hesab etmirik. Sanki bu xalqdan deyillər. Sən ölkəni bəyənməyib çıxıb getmisən, orada da yaşayırsan, bəs bu xalqdan niyə qisas alırsan? Bu xalqın niyə maraqlarına qarşı çıxırsan? Açığı, onların orada nə danışmalarının bizim üçün heç bir təhlükəsi yoxdur. Onsuzda dünyada ikili standartlar mövcuddur. Çox şadam ki, bu ikili standart artıq Avropa ölkələrinin özlərinə qarşı yönəlir. Onlar da bunun altını çəkməyə başlayıblar. Zənnimcə, tezliklə bunlar öz maraqları naminə bu siyasətlərindən uzaqlaşmalı olacaqlar”.

Baş redaktor mətbu orqanların bu məsələ ilə bağlı həmin siyasi partiyalara müraciət etmələri barədə deyilənlərə də münasibət bildirdi: “”KİV haqqında” Qanun var. Müraciət edirik. Şəxsən yaxınlarda müraciət etməmişik, amma vaxtilə Müsavat Partiyasına müəyyən məsələlərlə bağlı müraciətlərimiz olub. Yaxşı yadımdadır ki, Leyla Yunusla bağlı müraciətimiz olmuşdu. Bəzən olur ki, dövlət qurumuna müraciət edirsən, heç o qurumların mətbuat xidmətləri cavab vermir, partiyalar da həmçinin. Sonra nə etməlisən? Heç nə. Partiyalar ya özlərini eşitməməzliyə vururlar, ya informasiyalarının olmadığını deyirlər, ya da başdansovdu cavab verirlər. Bu məsələdə əsas mövqe bir olmalıdır. İqtidar da, müxalifət də bu xalqın övladlarıdır. İqtidardakılar xalqa xidməti bir formada, müxalifətdəkilər də başqa formada görürlər. Amma söhbət xalqdan gedirsə, burada yekdil mövqe olmalıdır. Bu baxımdan müxalifət də həmin şəxsləri ifşa etməli, mətbuata onların konkret siyahılarını verməlidirlər ki, qoy hər kəs onları tanısın”.