“Bakı-Tbilisi- Qars (BTQ) dəmiryol xəttinin işə salınması tək Azərbaycan üçün deyil, region üçün əlamətdar gün idi”. Bu fikri politoloq Zaur Məmmədov deyib.

O qeyd edib ki, Azərbaycan coğrafi cəhətdən əlverişli məkanda, istər şimalla cənub, istərsə də şərqlə qərb dəhlizlərinin mərkəzində yerləşir: “Azərbaycanın xarici siyasətinin əsas istiqamətlərindən biri də odur ki, ölkəmiz müxtəlif layihələr çərçivəsində  nəqliyyat qovşağı kimi dünyaya inteqrasiya olunsun”.

Politoloq deyib ki, BTQ-nin siyasi çəkisini xüsusilə vurğulamaq lazımdır. Onun sözlərinə görə, Ermənistan dəmiryolunun işə salınması ilə növbəti dəfə regional layihədən təcrid olundu: “Ermənistanın arzusu İrandan İrəvana daha sonra isə Gümrü – Qars vasitəsilə Türkiyəyə çıxış əldə etmək idi. Digər dəmiryolu xətti kimi İrəvan – Tbilisi nəqliyyat şəbəkəsinin də reallaşmasında maraqlı idilər. Lakin görünən odur ki, ermənilərin bu planları Qarabağ münaqişəsinin həllini tapmayana qədər gerçəkləşməyəcək”.

Politoloq həmçinin vurğulayıb ki, BTQ vasitəsilə Asiya və Avropa arasında yüklərin daşınması baş tutacaq və bu da ölkəmizin beynəlxalq ticari əlaqələrdə nüfuzunun yüksəlməsinə səbəb olacaq: “BTQ təkcə Mərkəzi Asiyadan Avropaya yüklərin daşınması ilə hüdudlanmır. Eyni zamanda sərnişinlər də artıq birbaşa olaraq Bakıdan İstanbula və əksinə qatarla gedə biləcəklər. Layihənin turizmin inkişafında da payı olacaq”.   Azadinform.az