NATO-ya üzv olan bir sıra ölkələr hərbi xərclərini artırıb
NATO-ya üzv olan Avropa ölkələri və Kanada son on ildə hərbi xərclərini 600 milyard dollar artırıb.
Bunu NATO-nun Baş katibi Yens Stoltenberq alyansın müdafiə nazirlərinin görüşündən öncə keçirilən mətbuat konfransında deyib.
“Alyansa daxil olan Avropa ölkələri və Kanada 2014-cü ildən bəri hərbi xərclərini 600 milyard dollar artırıb. Ötən il biz rekord həcmdə – 11 faizlik artım müşahidə etmişik. Bu il 18 müttəfiqin hərbi xərclərinin ümumdaxili məhsullarının 2 faizinə çatacağını gözləyirik”, – deyə Yens Stoltenberq bildirib.
Onun sözlərinə görə, NATO-ya üzv Avropa ölkələri 2024-cü ildə müdafiə sahəsinə 380 milyard dollar xərcləyəcək.
“2024-cü ildə Avropadakı müttəfiqlərimizin müdafiə sahəsinə ayıracağı vəsait ilk dəfə onların ÜDM-nin 3 faizini təşkil edəcək. NATO-nun digər ölkələri də bu yolla getməlidir”, – deyə Baş katib əlavə edib.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP