Bakı Dövlət Universitetinin (BDU) Jurnalistika fakültəsində TRT-nin sosial media və xəbər mütəxəssisi, Türkiyənin tanınmış media araşdırmaçısı Bahadır Avşarla görüş olub.
Bu barədə BDU-dan məlumat verilib.
Görüşdə fakültənin dekanı Vüqar Əliyev yüksəkixtisaslı mütəxəssislərin hazırlanması ilə bağlı fikirlərini bildirib. Dekan, eyni zamanda, görüşün məqsədi barədə məlumat verib.
Bahadır Avşar jurnalistikanın tarixi, nəzəriyyəsi və müasir vəziyyətindən danışıb, xəbərçiliyin əsasları, yeni media, sosial media, internet televiziya kanallarının iş prinsipləri haqqında tələbələri məlumatlandırıb.
Görüş Jurnalistika fakültəsi ilə AzTV-nin Teleradio Akademiyası arasında imzalanmış əməkdaşlıq müqaviləsi çərçivəsində reallaşdırılıb.
Qeyd edək ki, rəqəmsal diplomatiya sahəsində doktorluq dərəcəsi almış Bahadır Avşar uzun illər Türkiyədə bir sıra dövlət qurumlarında media və ictimaiyyətlə əlaqələr üzrə çalışıb. O, 2015-ci ildən TRT-nin Baş katibliyində araşdırmaçı kimi fəaliyyət göstərir və jurnalistikanın müxtəlif istiqamətləri üzrə təlimlər təşkil edir.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP
