Ölkə ərazisində baş verə biləcək yanğınların söndürülməsində müstəsna rolu olan yanğınsöndürmə balonlarının xaricdən gətirilməsi ilə yanaşı respublika ərazisində də yanğınsöndürmə balonlarının istehsalı, tərkibinin yenidən doldurulması, onlara texniki qulluğun göstərilməsi işləri həyata keçirilir.
Lakin qeyd olunan sahədə fəaliyyət göstərən müəssisələr tərəfindən bəzi pozuntuların olması ilə bağlı məlumatlar da məlumdur.
Belə ki, redaksiyamıza verilən məlumata görə, Bakı şəhəri, Suraxanı rayonu, Zığ qəsəbəsi, Zığ yolu küçəsi ünvanında yerləşən “Qızıl Əllər” MMC-yə və Bakı şəhəri, Nizami rayonu, 2016-cı məhəllə, 2-ci köndələn ünvanında yerləşən “Fire Safety Caspian Azerbaijan” MMC-yə məxsus yanğınsöndürmə balonların dolumu sexləri fəaliyyət göstərir. Adları çəkilən müəssisələrin yerləşdiyi ünvanların yaxınlığında yaşayış evlərinin mövcud olduğu bildirilir. İddia olunur ki, bu müəssisələr tərəfindən yanğınsöndürmə balonlarının dolumunda istifadə olunan kimyəvi toz maddələr insanların həyat və sağlamlığına, habelə ətraf mühitə ciddi təhlükə yaradır.
Habelə redaksiyamıza edilmiş telefon zəngində vətəndaş bildirdi ki, “Lider Yanğın” MMC tərəfindən ona məxsus yanğınsöndürmə balonlarının təkrar dolumu keyfiyyətlə həyata keçirilməyib. Ümid edirik ki, yuxarıda qeyd olunan məsələlərlə bağlı vətəndaşların narahatlığına aidiyyəti dövlət qurumları çevik münasibət bildirəcək.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP
