BDU əlavə təhsil almaq üçün tələbə qəbulu elan edir

Bakı Dövlət Universiteti 2022-2023-cü tədris ilində əlavə təhsil (təkrar ali təhsil) almaq üçün tələbə qəbulu elan edir.

Bu barədə BDU-dan məlumat verilib.

Əlavə təhsil almaq üçün tələbə qəbulu ekologiya, kompüter elmləri, coğrafiya, tarix, beynəlxalq münasibətlər, filologiya (Azərbaycan dili və ədəbiyyatı), iqtisadiyyat, psixologiya, sosial iş, hüquqşünaslıq, geologiya, dövlət və ictimai münasibətlər, davamlı inkişafın idarə edilməsi, biznesin idarə edilməsi ixtisasları üzrə elan olunur.

Əlavə təhsil (təkrar ali təhsil) yalnız ödənişli əsaslarla, qiyabi təhsilalma forması üzrə müəssisə, təşkilat, idarə və ayrı-ayrı vətəndaşlarla Bakı Dövlət Universiteti publik hüquqi şəxs arasında bağlanılmış fərdi müqavilələr əsasında həyata keçirilir. Əlavə təhsil müvafiq ixtisas üzrə bakalavriat (və ona bərabər tutulan) səviyyəsi üçün mövcud olan baza təhsil proqramlarındakı ümumi və ixtisas fənləri bölümlərini əhatə etməklə, tələbənin əvvəlcə aldığı baza təhsil proqramı ilə yeni ixtisasın baza təhsili proqramı arasındakı fərq nəzərə alınmaqla, xüsusi hazırlanmış təhsil proqramları əsasında aparılır.

Əlavə təhsil almaq istəyən şəxslər aşağıdakı sənədləri təqdim etməlidirlər:

– Rektorun adına ərizə;

– Ali təhsil haqqında sənədin (diplomun və ona əlavənin) notarial qaydada təsdiq olunmuş surəti;

– 3×4 santimetr ölçüdə 4 ədəd fotoşəkil;

– Sağlamlıq haqqında arayış;

– Şəxsiyyət vəsiqəsinin surəti.

Xarici ali təhsil müəssisələrinin məzunları aldıqları ixtisasların Azərbaycan Respublikası ərazisində tanınması və ekvivalentliyi barədə Təhsil Nazirliyi tərəfindən verilmiş şəhadətnamə təqdim etməlidirlər.

Sənədlər iyulun 18-dən avqustun 18-dək (şənbə, bazar və bayram günləri istisna olmaqla) saat 10:00-dan 17:00-dək əsas binada (241 nömrəli otaqda) qəbul edilir.

Əlavə təhsil almaq üçün universitetə sənəd vermiş şəxslərlə müsabiqə təşkil edilir. Müsabiqəni uğurla keçənlər müqavilə yolu ilə əlavə təhsil ixtisası üzrə tələbələr sırasına qəbul edilirlər.

Tədris Azərbaycan və rus dillərindədir. Təhsil haqqı müqavilə əsasında ayrı-ayrı ixtisaslara uyğun olaraq ödənilir.

Ünvan: Bakı şəhəri, Akademik Zahid Xəlilov küçəsi 33, AZ-1148

Telefon: (012) 510-71-78

Elektron poçt: tim-elavetehsil@bsu.edu.az

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin:    0 55 4 61 71 21 WHATSAPP