Goranboy rayonu Nadirkənd kəndində  yaşayan Məmmədov Teymur İsmayıl oğlu təxminən 1 ay öncə internetdən limitsiz istifadə etmək üçün Azercell-dən nömrə alıb. Lakin işlədəcəyi tarifin kodunu yollamadan dostu ondan xəbərsiz telefonu ilə internetdən 6 saata yaxın istifadə edib, çünki ona Azercell-dən belə bir nömrə aldığını söyləmişdi. Amma dostu bilmirdi ki, internetin limitsiz olması üçün Teymur hələ kod yollamayıb. Nəticədə Teymurun adına 1265 AZN borc yazılıb.

Aylığı 15 AZN olduğu halda 6 saata bu qədər borc necə yarana bilər? Bu sualla Teymur Azercell-in Gəncə filialına müraciət edib. Ona bildiriblər ki, tarifə qoşulmadan internetdən istifadə haqqı 1Mbt üçün 0.4 AZN hesablanır. Uzun söhbətdən sonra filialın rəsmisi əvvəl 30 %, sonra isə 50% güzəşt edə biləcəyini söyləyib.

Problemlə bağlı Azercell-in müştəri xidmətinə onlayn müraciət ünvanlanıb. Şirkət öz rəsmi saytında istənilən şikayətə 5 iş günü ərzində cavab verdiyini yazır. Lakin müraciətdən 1 həftə keçməsinə baxmayaraq heç bir cavab yoxdur. Gəncə filialının rəsmisinə “niyə limiti keçdiyində  xəbərdarlıq mesajı göndərilməyib və yaxud bağlantı kəsilməyib” sualına məntiqsiz cavab verilib: “Siz bu 6 saat ərzində internetdən çıxmamısınız, ona görə sizə xəbərdarlıq edə bilməmişik”. Axı ən azından SMS yollamaq olardı …

Şikayətçi  Teymur Məmmədov “Azercell Telecom MMC”-nin prezidenti xanım Zərinə Zeynalovanın yarıtmaz işindən Nəqliyyat, Rabitə və Yüksək Texnologiyalar Nazirliyinə, həmçinin Prezident Aparatına problemlə şikayət yazıb. Borc ləğv edilmədiyi halda Azercell-i məhkəməyə verəcəyini deyən Teymur Məmmədov hətta  istifadəçilərin Azercell-in müştərinin cibinəgirmə siyasətindən boğaza yığıldığını da deyib. Şirkətin fəaliyyətindən narazı olan yetərincə şikayətçi olduğunu söyləyən  Teymur Məmmədov bütün istifadəçiləri Azercell-i boykot etməyə çağırıb.

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin:    0 55 4 61 71 21 WHATSAPP