Paytaxtın Yasamal rayonu ərazisindəki Cəfər Cabbarlı küçəsinin kənarında yolun hərəkət istiqamətini göstərən bir lövhə quraşdırılıb. Diqqətlə baxdıqda, lövhənin piyadaların gediş-gəlişi üçün nəzərdə tutulan səkinin düz ortasında qoyulduğunun şahidi oluruq. Bu da oradan keçənlərin haqlı narazılığına və istehzasına səbəb olur. Gediş-gəlişə mane olan lövhənin niyə məhz bu vəziyyətdə quraşdırılması ilə maraqlandıq .
Məsələyə aydınlıq gətirmək üçün, ilk olaraq Azəravtoyol Açıq Səhmdar Cəmiyyətinin mətbuat katibi Anar Nəcəfli ilə əlaqə saxladıq. O söylədi ki: Azəravtoyol ASC icraedici qurum olduğu üçün, hər hansı bir yol nişanını quraşdırarkən, ilk öncə Baş Dövlət Yol Polisi və Bakı Nəqliyyat Agentliyi ilə razılaşdırdıqdan sonra bu işləri həyata keçirir. Onun fikrincə, lövhə tam olaraq qanuni və standartlara uyğun quraşdırılıb.
Bakı Nəqliyyat Agentliyi ilə, əlaqə saxlalamaq mümkün olmadı. Quruma dəfələrlə zəng etsək də, telefonlar ya məşğul oldu, ya da susdu…
Daxili İşlər Nazirliyi (DİN) Respublika Baş Dövlət Yol Polisi İdarəsinin (DYP) İctimaiyyətlə əlaqələr şöbəsinin rəisi, polis polkovnikı Kamran Əliyevlə və Bakı şəhər DYP-nin ıctimaiyyətlə əlaqələr şöbəsinin rəisi Vaqif Əsədovla əlaqə yaratmaq cəhdimiz də baş tutmadı.
Məlumat üçün xatırladırıq ki, Yol Hərəkəti Haqqında qanunun 61-ci maddəsinə əsasən, nişan ən azı 100 metr məsafədən aydın şəkildə görünməlidir. Lakin sözügedən yol nişanını yalnız lövhənin altından keçən piyadalar görür. Sürücülər isə, dönmə əməliyyatında çaşıb qalırlar. Çünki 100 metr uzaqdan nişan görünmür. Nişanı yolun üzərindən havada quraşdırmaq məqsədəuyğun olardı. Belə ki magistral yollarda, yaşayış məntəqələrinin əsas yollarinda bunu ediblər və bu təcrübə bizdə var.
mediazona.az
