“Azərbaycanın coğrafiyaçı alimləri” kitabı işıq üzü görüb
AMEA-nın akademik Həsən Əliyev adına Coğrafiya İnstitutunun “Azərbaycanın coğrafiyaçı alimləri” kitabının ikinci nəşri çapdan çıxıb.
AMEA-dan bildirilib ki, kitabın baş redaktoru institutun baş direktoru coğrafiya elmləri doktoru Zakir Eminov, redaktorları coğrafiya üzrə fəlsəfə doktorları Zaur İmrani, Mirnuh İsmayılov və mərhum Nizami Əyyubovdur. Nəşr coğrafiya üzrə fəlsəfə doktorları Abil Haqverdiyev və mərhum Məhərrəm Həsənov tərəfindən tərtib edilib.
Vəsaitdə respublikamızda coğrafiya elminin inkişafında, onun təbii şəraitinin və ehtiyatlarının öyrənilməsində xidmətləri olmuş bütün coğrafiyaçı alimlər haqqında ensiklopedik məlumat toplanıb. Kitabda hər bir alimin elmə verdiyi töhfələr qısa şəkildə təhlil edilir, nəşr etdirdiyi mühüm məqalə, monoqrafiya, dərslik, dərs vəsaiti ayrıca qeyd olunur.
Elmi və tarixi əhəmiyyət daşıyan toplu son 100 ildən artıq bir dövrdə yaşamış coğrafiyaçıların fəaliyyətinə işıq salan mənbə rolunu oynayır.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 055 461 71 21 WHATSAPP