Azərbaycan Xalqının Ümummilli Lideri Heydər Əliyevin anım gününə həsr olunmuş “Azərbaycanla Gürcüstan arasında münasibətlərin strateji tərəfdaşlıq səviyyəsinə çatmasında Heydər Əliyevin rolu” adlı beynəlxalq videokonfrans keçirilib.

Azərbaycanın Gürcüstandakı Səfirliyinin təşəbbüsü ilə keçirilən tədbirdə ölkəmizin xarici işlər nazirinin müavini Xələf Xələfov, Milli Məclisin Azərbaycan-Gürcüstan parlamentlərarası əlaqələr üzrə işçi qrupunun rəhbəri Arzu Nağıyev, Milli Məclisin GUAM PA-dakı  nümayəndə heyətinin rəhbəri Elnur Allahverdiyev, Gürcüstanla parlamentlərarası işçi qrupunun üzvü Əminə Ağazadə,  Gürcüstan xarici işlər nazirinin müavini Laşa Darsalia, Gürcüstan Parlamentinin vitse-spikeri, Gürcüstan-Azərbaycan parlamentlərarası əlaqələr üzrə işçi qrunun rəhbəri, GUAM PA-dakı Gürcüstan nümayəndə heyətinin rəhbəri Kaxa Kuçava, hər iki ölkənin səfirləri Faiq Quliyev, Zurab Pataradze və digər rəsmi şəxslər iştirak edib.

Video-konfransı açan Azərbaycanın Gürcüstandaki fövqəladə və səlahiyyətli Səfiri Faiq Quliyev bildirib ki,  Azərbaycanla Gürcüstan arasında diplomatik əlaqələr rəsmən 1992-ci ildə yaradılsa da, bu əlaqələr 1993-cü ildən – Ulu Öndər Heydər Əliyevin xalqın təkidli tələbi ilə ikinci dəfə hakimiyyətə qayıdışından sonra inkişaf etməyə başlayıb. 1995-ci ilin fevral ayında Bakıda Gürcüstanın, 1996-cı ilin martında isə Tbilisidə Azərbaycanın səfirlikləri fəaliyyətə başlayıb.   Bundan  başqa, hər  iki  ölkənin parlamentində  dostluq  qrupları fəaliyyət göstərir.

Bildirilib ki, Ümummilli Lider Heydər Əliyev Azərbaycanın Gürcüstanla əlaqələrinə daim xüsusi diqqət yetirib və onun çətin dövrlərində dost ölkə kimi qardaşlıq yardımını əsirgəməyib. Hələ 1994-cü ildə “Əsrin müqaviləsi” imzalanarkən bütün çətinliklərə, təzyiqlərə baxmayaraq, ulu öndər Heydər Əliyevin siyasi iradəsi və təkidi ilə enerji layihələri – Bakı-Tbilisi-Ceyhan və Bakı-Tbilisi-Ərzurum neft və qaz kəmərlərinin məhz dost Gürcüstandan keçəcəyi barədə qərar verilib. Hazırda Ümummilli Liderimizin siyasi kursunu Prezident İlham Əliyev uğurla davam etdirir. Dövlətimizin başçısının təşəbbüsü və rəhbərliyi ilə həyata keçirilən enerji layihələri nəinki Azərbaycanın, bütövlükdə regionun inkişafında mühüm rol oynayır.

Sonra çıxış edən Milli Məclisin Azərbaycan-Gürcüstan parlamentlərarası əlaqələr üzrə işçi qrupunun rəhbəri Arzu Nağıyev vurğulayıb ki, Ulu Öndərimizin ən böyük arzusu işğal olunmuş torpaqlarımızın azad edilməsi idi. O, bunun üçün var qüvvəsi ilə çalışırdı və onun ən böyük xidmətlərindən biri də 1994-cü ildə atəşkəslə bağlı sənədin imzalanması olmuşdu.

Sonra çıxış edən Gürcüstan parlamentinin sədr müavini, Gürcüstan-Azərbaycan parlamentlərarası əlaqələr üzrə işçi qrupunun rəhbəri Kaxa Kuçava Gürcüstan-Azərbaycan əlaqələrinin inkişafında Heydər Əliyevin rolundan, iki ölkə arasında strateji tərəfdaşlıq, həm hökumət, həm də parlament səviyyəsində səmərəli əməkdaşlıq məsələlərindən danışıb. Bildirib ki, bu cür münasibətlər hər iki tərəf üçün daim strateji əhəmiyyət daşıyaraq xalqlarımızın milli mənafeyinə söykənir.

Sonra GUAM PA-dakı Azərbaycan nümayəndə heyətinin rəhbəri Elnur Allahverdiyev və Azərbaycan-Gürcüstan parlamentlərarası əlaqələr üzrə işçi qrupunun üzvü Əminə Ağazadə öz fikirlərini bildiriblər. Deputatlar qeyd ediblər ki, gürcü və Azərbaycan xalqlarını tarixi dostluq telləri birləşdirir. Bildirilib ki,  müstəqillik dövründə ölkənin vətəndaş müharibəsindən xilas olması, Ermənistanla atəşkəsin əldə edilməsi, sonra isə güclü ordu quruculuğuna başlanmasının, Azərbaycanın bu gün uğurla həyata keçirilən neft strategiyasının, səmərəli xarici siyasətinin əsasları da məhz böyük dövlət xadimi Heydər Əliyev tərəfindən qoyulub. Bu gün Azərbaycanın ərazi bütövlüyünün bərpa olunması da Heydər Əliyev siyasətinin Prezident, Müzəffər Ali Baş Komandanımız İlham Əliyev tərəfindən uğurla davam etdirilməsinin bariz nəticəsidir.

Bununla da Azərbaycan Xalqının Ümummilli Lideri Heydər Əliyevin anım gününə həsr olunmuş “Azərbaycanla Gürcüstan arasında münasibətlərin strateji tərəfdaşlıq səviyyəsinə çatmasında Heydər Əliyevin rolu” adlı beynəlxalq videokonfrans başa çatıb.