Azərbaycan-Türkiyə arasında strateji tərəfdaşlıq münasibətlərinin inkişaf etdirilməsi və möhkəmləndirilməsi iki qardaş ölkənin xarici siyasətinin əsas prioritetlərindən biridir.Hər iki ölkənin dövlət və hökumət başçılarının qarşılıqlı səfərləri, möhkəm dostluğu və əlaqələri dərinləşdirmək arzusu ikitərəfli əməkdaşlığın inkişafında əhəmiyyətli rol oynayıb. Ölkələrimiz arasında bütün sahələrdə əlaqələrin dinamik şəkildə inkişafının göstəricisi olan meqa iqtisadi layihələr; Bakı-Tbilisi-Ceyhan neft, Bakı-Tbilisi-Ərzurum qaz kəmərləri və Bakı-Tbilisi-Qars dəmir yolu layihələri regionda sülhün və təhlükəsizliyin təmin olunmasına öz töhfəsini verməklə yanaşı, xalqlarımızın rifah halının yaxşılaşdırılmasına xidmət etməkdədir.

2000-ci illərdən etibarən Azərbaycanın sürətli iqtisadi inkişafı Azərbaycanlı işadamlarının Türkiyə iqtisadiyyatına investisiya qoyuluşlarında da öz əksini tapmışdır. Buna nümunə kimi, son illərdə Azərbaycan şirkətləri Türkiyədə xarici investisiya qoyuluşuna görə ilk yerləri tutur. Zaman zaman iki ölkə arasında münasibətlərə kölgə salmağa çalışan qaranlıq qüvvələr payda olmasına baxmayaraq, Azərbaycan-Türkiyə iqtisadi əlaqələri hər keçən gün daha da möhkəmlənir.

Türkiyənin sürətli iqtisadi inkişafına paralel olaraq, daxildə və xaricdə onun iqtisadi inkişafını həzm edə bilməyən qüvvələr var. Bu qüvvələr hər vəchlə Türkiyəni geri salmağa, zəiflətməyə, qarışdırmağa, parçalamağa çalışır. Bu yolla Türkiyəni kontrol etmək, rəqabət gücünü azaltmaq, özlərindən asılı, möhtac vəziyyətə salmaq istəyirlər. Bunun bariz örnəyini keçən ilin iyulunda ABŞ-ın Pensilvaniya əyalətindən idarə olunan fəthullahçı qrupun Türkiyəni fəlakətə sürükləmə cəhdlərinə hamımız şahid olduq. Fəthullahçı xainlərə qarşı Türkiyə hakimiyyətinin və xalqının cəsarətli müqaviməti sayəsində bugün qardaş ölkə dimdik ayaqdadır.

Türkiyədə FETÖ-nün çeviriliş cəhdidən sonra məhkəmə-prokurorluq orqanlarının apardığı istintaq fəaliyyətləri fəthullahçı qrupun qardaş ölkədə maxinasiyalarını, onlara boyun əyməyən, “xərac” verməyən, rəqib görünən işadamlarına qarşı şantaj və təhditlərini, sabotajlarını üzə çıxardıb. Belə görünür ki, Türkiyənin bütün dövlət strukturlarına və özəl qurumlarına virus kimi yayılan bu cinayətkar şəbəkə ünsürlərini müəyyən eləmək və təmizləmək hələ çox vaxt aparacaq.

Moderator.az Türkiyədə azərbaycanlı işadamlarına qarşı FETÖ-nün xain əməlləri haqqında araşdırma aparıb. Bu araşdırmada Palmali Holdinqin sahibi, vətənpərvər azərbaycanlı işadamı Mübariz Mənsimovun Türkiyənin səhiyyə sektorunda həyata keçirmək istədiyi investisiya layihələrinə qarşı 2007-2012-ci illərdə fəthullahçı şəbəkənin sabotaj fəaliyyətlərinə nəzər salınıb.

Türkiyədə 2001 krizisində İşıqlar Holdinqin idarə edilməsi Türkiyə Əmanətlərin Sığorta Fonduna (TMSF) həvalə edilmiş, TMSF isə İşıqlar Holdinqin maliyyə qurumlarına olan borclarını ödəmək üçün daşınmaz əmlaklarını satışa çıxarmışdı. 2004-cü ilə keçirilən hərracda Mübariz Mənsimov İstanbulun Beşiktaş ilçəsi Ulus səmtində İşıqlar Holdinqə aid binanı TMSF-dən satın almışdı. 2005-cə ildə isə bu binanın yerinə tibb müəssisəsi tikilməsi üçün Beşiktaş Bələdiyyəsindən icazə almış, “Palmed” Sağlık Hizmetleri LTD şirkətini qurmuşdu.

Azərbaycanlı işadamı Mübariz Mənsimov 2007-ci ildə “Hürriyət” qəzetinə açıqlamasında bunları demişdi: “Türkiyədə ən böyük xəstəxana layihələrindən birini həyata keçirəcəyik. 2008-ci ilin yayında İstanbulun Ulus səmtində açmağı planlaşdırdığımız ilk xəstəxananın inşaatı davam edir. 120 yataqlı, 7 ulduzlu ilk xəstəxananın smeta dəyəri 100 milyon dollardır. “Pal Hospital” adı veriləcək bu xəstəxana əsasən uşaq və qadın xəstəlikləri sahəsində ixtisaslaşacaq. Xəstəxana amerikalı tibbi heyət tərəfindən idarə olunacaq. İstanbuldakı xəstəxananın bir bənzəri də Bakıda inşa edilir. Regionda ixtisaslaşdırılmış xəstəxanalar zənciri qurmağı planlaşdırırıq. İstanbul və Bakıdan sonra Ankara və İzmirdə də xəstəxana açacağıq.”

Mübariz Mənsimovun xəstəxana layihəsi qeyri-müəyyən səbəblərdən Türkiyədə qaranlıq qüvvələrin hədəfinə çevrildi. Fəthullahçı qruplaşma bu layihənin baş tutmaması üçün bələdiyyə, məhkəmə, prokurorluq, ordu və ictimai təşkilatlardakı əlaltıları vasitəsilə hücuma keçdi. Fəthullahçıların yuva qurduğu Türkiyə Hərbi Hava Qüvvələrinin İstanbulun Ulus səmtində yerləşən 15 saylı Raket Hücumlarından Müdafiə hərbi bazasının komandirliyi xəstəxananın yerləşdiyi ərazini “hərbi təyinatlı zona” elan edərək 2008-ci ilin fevralında Palmali Holdinqə məktub göndərdi. Məktubda xəstəxananın inşasının raket hücumundan müdafiə sisteminin fəaliyyətinə maneçilik törətdiyi qeyd edilir və inşaatın 2 gün ərzində dayandırılması tələb edilirdi. Palmali Holdinqin Türk Silahlı Qüvvələri Baş Qərargahına təqdim etdiyi layihədə dəyişiklik təklifləri də nəticəsiz qaldı. Ardından İstanbul Böyük Şəhər Bələdiyyəsi xəstəxana tikmək üçün 2005-ci ildə verdiyi qərarı ləğv elədi.

2010-cu ildə isə Fəthullahçı hakim və prokurorların saxta Ergenekon iddianamələri ilə həbs edilən atatürkçü hərbçilər üzərindən Mübariz Mənsimova qarşı təzyiqlər başladı. Fəthullahçı qrupa aid “Zaman” qəzetində yayımlanan xəbərdə, “hərbi təyinatlı zona” qərarının ləğv edilməsi qarşılığında hərbi prokuror Ahmet Zeki Üçokun Mübariz Mənsimovdan 5 milyon dollar rüşvət istədiyi iddia olunurdu. Əslində isə Ergenekon iddianamələrini hazırlayan fəthullahçı prokurorlar bu iddialarla həm atatürkçü hərbi prokuror Ahmet Zeki Üçoku zərərsizləşdirməyi, həm də Mübariz Mənsimova təzyiq göstərərək xəstəxana layihəsini təxirə salmağı qarşılarına məqsəd qoymuşdular. Nəzərə alsaq ki, həmin illərdə fəthullahçı hakimlərin nəzarətində olan “özəl yetkili” məhkəmələrdə minlərlə vətənpərvər, vicdanlı Türk milliyyətçisinin saxta ittihamlarla həbsinə qərar verilmişdi, Mübariz Mənsimovun bu durumdan narahatçılığını təsəvvür etmək çətin deyil.

Xəstəxananın inşaatına qoyulan qadağa aradan qaldırılmadı. Bu durumdan dərin məyusluq keçirən azərbaycanlı işadamı Mübariz Mənsimov 2012-ci ildə xəstəxana layihəsini təxirə saldı və “Palmed” şirkətini ləğv elədi. Elə həmin il Medical Park xəstəxanalar qrupunun sahibi işadamı Ethem Sancak yarımçıq tikilini Mübariz Mənsimovdan satın aldı. Maraqlıdır ki, o illərdə FETÖ-nün nəzarətindəki İstanbul Bələdiyyəsi və Türkiyə Hərbi Hava Qüvvələri Komandirliyi artıq xəstəxananın inşaatına maneçilik törətmədi. Hal-hazırda həmin xəstəxana Medical Park xəstəxanalar qrupunun nəzdində “Liv Hospital” adı ilə fəaliyyət göstərir və Türkiyənin ən bahalı A+ xəstəxanalarından biridir.

Mübariz Mənsimov Azərbaycanlı kimliyini həmişə şərəflə daşıyan və Türkiyə iqtisadiyyatına böyük investisiya qoyuluşları edərək qardaş ölkədə Azərbaycan diasporasının və nüfuzunun güclənməsinə xidmət edən həmyerlimizidir. Bu araşdırma ilə, FETÖ-nün məkrli planını ifşa eləyərək azərbaycanlı işadamı Mübariz Mənsimova qarşı edilən və ictimaiyyətə məlum olmayan haqsızlığı ortaya çıxarırıq.