Vətən uzaqda deyil

Avstriyanın İctimai Radiosunun aparıcısı Yohans Qroys Azərbaycana gəlib və ölkəmizlə bağlı verilişlər hazırlamağa başlayır. Səfərin təşkilində diaspor nümayəndələri yaxından iştirak edib.

– Hans, Azərbaycana xoş gəlmisiniz. Bildiyim qədəri ilə siz Avstryanın İctimai Radiosunun aparıcısısınız. Verilişiniz nədən bəhs edir?

– Verilişim mədəniyyətlə bağlıdır. Musiqi, din və bir az da siyasətdən bəhs edir. Sizin milli bayramınızla əlaqədar 21 martdan etibarən bir həftə davam edəcək verilişlərimizdə Azərbaycan, Bakı barədə yayımlar edəcəyik. Mövzumuz azərbaycanlıların yaşayışı olacaq. Azərbaycan barədə daha çox miflər eşidirik, məlumatımız çox azdır. Çalışacağıq ki, bir həftə ərzində sizə daha yaxın olaq.

– Azərbaycana ilk səfərinizdir?

-Bəli , ilk səfərimdir.

-Azərbaycanı necə təsəvvür edirdiniz və indi təəssüratlarınız necədir?

-Azərbaycana marağım Eurovision Mahnı Müsabiqəsinin burda keçirildiyi dövrdə yaranıb. Musabiqə vaxtı Bakı haqqında sənədli filmlərə baxmışdım. Azərbaycanda qadınların təhsil səviyyəsinin çox yüksək olduğunu eşitmişdim. Düzü, bu bir az məni təəccübləndirmişdi. Fikirləşirdim ki, necə ola bilər ki, müsəlman ölkəsində qadınların yarısının ali təhsili olsun. Mən özüm fəlsəfə üzrə təhsil almışam, ona görə də məni kişilərin, insanların bu məsələyə münasibəti daha çox maraqlandırırdı. Bakı haqqında bildiyim məlumat Alov qüllələrinin burada yerləşməsi və neftlə zəngin olması idi. Başqa heç nə bilmirdim Ona görə də hələ Vyanada olanda araşdırmaya başladım. İndi məncə, 2-3 % nəsə öyrənmişəm. Sabah dini təsirləri araşdırmaq üçün Şəkiyə gedəcəyik. Bugün də İctimai televiziyada oldum. Düzü, bir xeyli təəccübləndim. Fərqli şəkildə müsahibənin götürüldüyü 3D innovativ yayım forması ilə tanış olduq. Bu çox maraqlı idi. İctimai Radioya da baş çəkdik. İctimai Radioda sürücülər üçün proqram var. Bizim radiolarda bu cür verilişlər yoxdur. Maşını necə düzgün sürmək lazımdır?! Bu, bir tərəfdən əyləncəlidir, digər tərəfdən isə bu cür verilişin olması çox maraqlıdır.

-Azərbaycanla bağlı hansı mövzulara toxunacaqsınız?

–Bir həftə ərzində “Qonşu Azərbaycan” adlı 3 veriliş efirdə olacaq. Birinci veriliş Azərbaycanda din mövzusuna həsr olunacaq, məscidlər, kilsələr və sineqoqlar barədə olacaq. Növbəti radio verilişdə isə Azərbaycanda feminizm və qadınların təhsili məsələsinə toxunacam. Üçüncü proqramda isə saat yarım incəsənət və musiqidən söhbət acacağıq. Burda bacardığımız qədər Azərbaycan musiqisi və incəsənət nümunələrini təqdim edəcəyik.

-Qeyd etdiniz ki, Şəkiyə səfər edəcəksiniz. Başqa nə planlarınız var?

-Bəli, biz Şəkiyə gedəcəyik. Orda bir kənd var. Düzü, adı indi yadımdan çıxıb.Orda müxtəlif dini məbədlərin olduğunu bilirəm. 3 gün vaxtım var . Ona görə Bakıya qayıdıb, yenə burda araşdırma aparmalıyam.

-Azərbaycan barədə araşdırmalara necə başladınız?

-Araşdırmaya necə başladım? 9 yaşlı oğlum Nilsin sinif yoldaşı Ayişənin anası ilə tanış olduq. Ondan da soruşdum siz Azərbaycandansınız? Mən də elə Azərbaycan haqqında araşdırma aparıram. O məni həmkarı Rüfət Həsənovla tanış etdi. O mənə Azərbaycan haqqında xeyli məlumat verdi, sonra məni Azərbaycana dəvət etdi. Səfər boyu mənə yoldaşlıq edən Rüfətin sayəsində mən Azərbaycanın mədəniyyəti, tarixi və mətbəxi ilə daha yaxından tanış ola bilmişəm.

-Müsahibəyə görə təşəkkür edirəm.

-Təşəkkür edirəm. Mən də sizə işlərinizdə uğurlar arzu edirəm.

Fatimə Paşayeva