Qətər Dövləti Milli Gününü qeyd edir

Azərbaycana dost ölkə – Qətər Dövləti dekabrın 18-də milli gününü qeyd edir.

Ərəb ölkələri arasında böyük nüfuza malik olan Qətər xalqının milli həmrəyliyinin bayram edildiyi bu gün 2007-ci il iyunun 21-də vəliəhd şahzadə Təmim bin Həməd Al Taninin sərəncamı ilə təsis olunub.

Mühüm coğrafi əhəmiyyətə və güclü iqtisadiyyata malik olan Qətər ilə Azərbaycan arasında diplomatik əlaqələr 1994-cü il sentyabrın 14-də yaradılıb. Azərbaycan Prezidenti İlham Əliyevin 2004-cü il noyabrın 30-da Qətərə və Qətər Əmiri Şeyx Həməd bin Xəlifə Al Taninin Azərbaycana rəsmi səfərlərindən sonra diplomatik nümayəndəliklərin açılması ikitərəfli əlaqələrin inkişafında yeni mərhələnin başlanğıcı olub. 2007-ci ildə Azərbaycanın Dohada, Qətərin isə Bakıda səfirlikləri fəaliyyətə başlayıb. Məhz bundan sonra ikitərəfli münasibətlərin inkişafında intibah dövrü başlayıb. 2017-ci il fevralın 14-də dövlətimizin başçısının dost ölkəyə rəsmi səfəri zamanı imzalanmış “Azərbaycan Respublikası Hökuməti ilə Qətər Dövləti Hökuməti arasında mədəniyyət sahəsində əməkdaşlıq haqqında” Anlaşma Memorandumu, “Bakı Beynəlxalq Dəniz Ticarət Limanı” QSC və Qətər Limanları İdarəetmə Şirkəti “MWANİ Qatar” arasında Anlaşma Memorandumu, “Azərbaycan Respublikası Hökuməti və Qətər Dövləti Hökuməti arasında hava daşımalarına dair” Sazişə əlavə Protokol və digər mühüm sənədlər iqtisadiyyat, mədəniyyət və başqa sahələrdə əməkdaşlığın təməlini qoyub. Prezident İlham Əliyevin Qətərin böyük şirkət və holdinqlərinin rəhbərləri ilə görüşləri də qarşılıqlı sərmayələrin artırılması baxımından əhəmiyyətli olub.

2007-ci il martın 12-13-də Azərbaycanın birinci xanımı, Heydər Əliyev Fondunun prezidenti, UNESCO-nun və ICESCO-nun xoşməramlı səfiriı Mehriban Əliyevanın Qətərin birinci xanımı, UNESCO-nun ibtidai və ali təhsil üzrə xüsusi elçisi Şeyxa Moza bint Nasir Al Misnədinin dəvəti ilə UNESCO-nun və Qətər Elm, Təhsil və İcmanın İnkişafı Fondunun təşkil etdikləri “Ərəb dövlətlərində savadlılıq: tərəfdaşlığın qurulması və yeni yanaşmaların təşviqi” mövzusunda regional konfransda iştirakı iki ölkə arasında təhsil və mədəniyyət sahələrində əlaqələrin inkişafına mühüm töhfə olub.

Qeyd edək ki, Azərbaycanın ərazi bütövlüyünü həmişə dəstəkləyən Qətər Dövləti Vətən müharibəsi günlərində də ölkəmizin ədalətli mövqeyinə güclü dəstək ifadə edib. Qətər KİV-ləri, xüsusən nüfuzlu “Al Jazeera” televiziya kanalı Azərbaycanın haqlı mübarizəsinin ərəb dünyasında carçısı olub.

Mətbuat sahəsində ikitərəfli əlaqələrin inkişafında AZƏRTAC ilə Qətər Xəbər Agentliyi (QNA) arasında 2011-ci ildə imzalanan Anlaşma Memorandumunun böyük əhəmiyyəti var. Məhz bu sənəd iki dost ölkənin rəsmi informasiya agentlikləri arasında informasiya mübadiləsini, Azərbaycan həqiqətlərinin ərəb dünyasına çatdırılmasını təmin edib. Qətərin Azərbaycandakı səfiri Feysal bin Abdullah Həməd Abdullah Al Hinzabın beynəlxalq informasiya məkanında mühüm yeri olan “Al Jazeera” kanalı ilə AZƏRTAC-ın sıx əməkdaşlığına dair təklifi bu sahədə yeni imkanlar yaradacaq.