ABŞ təşvişdə: “Harvi”dən sonra “İrma”

Atlantik okeanından Karib hövzəsinə və ABŞ-ın Florida ştatına doğru hərəkət edən “İrma” qasırğası güclənərək Saffir-Simpson şkalası ilə 5-ci kateqoriyaya çatıb.

Milli.Az NBC-yə istinadən bildirir ki, qasırğanın mərkəzində küləyin sürəti 175 km/saata çatıb. Qasırğa qərbə doğru 5,8 m/saniyə sürətlə hərəkət edir.

ABŞ-ın Milli Qasırğa Mərkəzindən (National Hurricane Center) verilən məlumata görə, Atlantik okeanının qərb hissəsindəki “İrma” bu axşam Puerto-Rikoya və Karib hövzəsindəki adalara çatacaq.

Florida ştatında fövqəladə vəziyyət elan olunub. Birləşmiş Ştatların prezidenti Donald Tramp ştatın qubernatoru Rik Skotta bildirib ki, floridalılara bütün yardımlar göstəriləcək.

“İrma”nın Florida ştatının cənub hissəsinə şənbə günü, günorta saatlarında çatacağı ehtimal olunur.

Florida ştatının cənubundakı Ki-Uest şəhərində yerləşən hərbi-dəniz bazasından təqribən 5 min hərbçi və onların ailələri təxliyə olunublar.

Bazada sadəcə, 50-60 hərbçinin qalacağı gözlənilir.

Bölgədəki digər hərbi obyektlərdə də təxliyə və köçürülmə əməliyyatları aparılır. Bir sıra gəmilər, sualtı qayıqlar və təyyarələr də qasırğanın vura biləcəyi bölgədən çıxarılır.

ABŞ HDQ-nin yetkilisi Bill Doqerti bəyan edib ki, Quantanamodakı hərbi baza ilə yanaşı, bazanın ərazisindəki həbsxanada saxlanılan 41 məhbus təxliyə olunmayacaq.

“İrma” qasırğası avqust ayının sonlarında Texas sahillərini vuran və fəlakətli sonuclar verən “Harvi” qasırğasından dəfələrlə güclüdür.