Aqiyə Naxçıvanlı: “Möhkəm təməl üzərində qurulan ailələrin sayı azalır”

“Təəssüf ki, bu gün cəmiyyətimzidə möhkəm təməl üzərində qurulan ailələrin sayı azalır”.

Bunu Milli Məclisin Ailə, qadın və uşaq məsələləri komitəsinin sədri Aqiyə Naxçıvanlı bu gün keçirdiyi “Azərbaycanda ailə modeli: müasirlik və dəyərlər” mövzusunda keçirilən konfransda çıxışı zamanı deyib.

Onun sözlərinə görə, Azərbaycanda ailələrin dağılmasında artım müşahidə edilir.

Münaqişə olan ailələrdə uşaqların zəif formalaşdığını deyən komitə sədri bildirib ki, bu gün Azərbaycanda ailə institutunun qorunması prioritet istiqamətdir: “Tarixin hər bir mərhələsində ailə cəmiyyətin inkişafında rol oynayıb. Buna görə də cəmiyyət həmişə ailənin möhkəm bünövrə əsasında qurulmasına çalışır. Azərbaycan ailəsi dünyada özünəməxsusluğu ilə seçilir. Xalqımız həmişə ailə dəyərlərini yüksək tutub. Bu ailə modeli bu gün yaşayır və biz bununla fəxr edirik”.

A.Naxçıvanlı əlavə edib ki, cəmiyyətimizdə erkən nikahlar hələ də var: “Cəmiyyətimizdə erkən nikah, zorakılıq hallarına, erkən nikaha daxil olanların təhsildən yayınmasına rast gəlinir. Vətəndaş nikahı, başqa sözlə desək, kəbin nikahı olsa da, Azərbaycanda nikah və ailə münasibətlərinin tənzimlənməsi yalnız rəsmi qeydiyyatdan keçdikdə tanınır. Dini kəbinlər heç bir hüquqi qüvvəyə malik deyil”.