İranda qəzaya uğrayan Türkiyəyə məxsus təyyarənin göyərtəsində olan şəxslər arasında “Başaran Holding”in rəhbəri Hüseyn Başaranın qızı 28 yaşlı Minə və onun 7 rəfiqəsi olub. APA-nıın türk mətbuatına istinadən verdiyi xəbərə görə, bu barədə “Qızıl Aypara” cəmiyyətinin Türkiyə bölməsinin rəhbəri Kərəm Kınık bildirib.
Onun sözlərinə görə, İran xilasediciləri təyyarənin qəzaya uğradığı əraziyə 3-4 saata çatacaqlar. “Ərazidə kəskin hava şəraiti müşahidə olunur”, – deyə Kərəm Kınık qeyd edib.
Qeyd edək ki, bu gün Birləşmiş Ərəb Əmirliklərindən İstanbula uçan təyyarə Tehranın cənubunda, Şahrekord şəhəri yaxınlığında qəzaya uğrayıb. Dağlıq əraziyə düşən təyyarə yerə çırpılaraq yanmağa başlayıb. “Reuters” agentliyi təyyarədə 3 heyət üzvü və 8 sərnişin olmaqla, 11 nəfər olduğu və qəzada onların hamısının həyatını itirdiyi barədə məlumat yayıb.
