Rusiya kəşfiyyatının rəhbərləri məxfi şəkildə ABŞ-a getdi

Rusiyanın üç əsas kəşfiyyat xidmətinin rəhbəri gözlənilmədən ABŞ-a səfər ediblər. Bu barədə informasiyanı “Vaşinqton Post” qəzeti yayıb. Qəzet Xarici Kəşfiyyat Xidmətinin rəhbəri Sergey Narışkinin bu həftə ərzində Vaşinqtonda olduğunu bildirib. Narışkindən öncə isə ABŞ-a Rusiya Federal Təhlükəsizlik Xidmətinin rəhbəri Aleksandr Bortnikov və Rusiya Baş Kəşfiyyat İdarəsinin rəhbəri İqor Korobov (QRU) gəlib.

Onlar Vaşinqtona keçən həftə səfər ediblər. Bortnikov burada Narışkin kimi Mərkəzi Kəşfiyyat İdarəsinin rəhbər Mayk Pompeo ilə görüşüb. Korobovun isə Vaşinqtonda kimlərlə görüşdüyü hələlik bəlli deyil.

Qeyd edək ki, Narışkinin səfəri barədə bundan öncə Rusiyanın ABŞ-dakı səfiri Anatoli Antonov da məlumat yaymışdı. Hər üç şəxs hazırda ABŞ-ın sanksiyalar siyahısında yer alıblar.