2018-ci il aprelin 17-18-də Bakıda “Rəqəmsal bankçılıq və təhlükəsizlik” mövzusunda regional konfrans keçiriləcək. Tədbirdə Türkiyənin bank innovasiyaları lideri olan “Denizbank”ın rəqəmsallaşdırma rəhbəri Gurhan Çam skiper kimi çıxış edəcək.
Konfransın media tərəfdaşı olan AZƏRTAC xəbər verir ki, tədbirdə “Denizbank” və “Intertech” maliyyə texnologiya şirkəti banklara rəqəmsal bankçılığa tranformasiya imkanları və hazır həllər təqdim edəcək, bank avtomatlaşdırma proqram təminatlarını və avadanlıqlarını sərgiləyəcək.
Tədbir çərçivəsində maliyyə texnologiya avadanlıqlarının, proqram təminatlarının, bank avtomatlaşdırma sistemlərinin sərgisi baş tutacaq. Həmçinin müasir ödəmə və identifikasiya vasitələri, biometrik ATM ilə yanaşı, “Unionpay”, “AliPAY”(“ALIBABA”), “VISA”, “Mastercard” kimi maliyyə xidmətləri şirkətlərinin yeni innovativ təqdimatları gözlənilir.
Konfrans “Azərbaycan Respublikasında maliyyə xidmətlərinin inkişafına dair Strateji Yol Xəritəsi”nin tədbirlər planına istinad olaraq bankların rəqəmsal transformasiyasının sürətləndirilməsi üçün tənzimləmə mexanizminin təkmilləşdirilməsi istiqamətində görüləcək işlərin bir hissəsidir və “FA International Trade Events” (www.futureadvantage.events) şirkətinin təşkilatçılığı ilə keçirilir.
Tədbir barədə ətraflı məlumatı www.dbs-conference.org saytından əldə etmək olar.
