AMEA Mərkəzi Elmi Kitabxanası Mosula kitablar göndərdi
AMEA Mərkəzi Elmi Kitabxanası İraq Respublikasının Azərbaycandakı səfirliyinin müraciətinə əsasən 365 sayda kitabı Mosul şəhərindəki kitabxanalara göndərib. Olaylar.az bldirir ki, kitablar İraq Respublikasının Azərbaycandakı səfirliyinin üçüncü katibi xanım Enas Abdul Kadhim Mohammed Al-Khazrajiyə təqdim olunub. Təqdim olunan kitablar arasında elm, mədəniyyət, ədəbiyyat və tarix mövzularında olan kitablar üstünlük təşkil edib.
Xatırladaq ki, ölkəmizin elmi-mədəni yeniliklərinin, tarixi irsinin təbliğini əsas fəaliyyət meyarlarından biri kimi diqqətdə saxlayan Mərkəzi Elmi Kitabxana ölkə daxilində və xaricində fəaliyyət göstərən müxtəlif qurumların – elmi müəssisələrin, təhsil ocaqlarının, səfirliklərin, diaspor nümayəndəliklərinin, həmçinin digər təşkilatların kitab əldə edilməsi ilə bağlı müraciətlərinə dəstək verib. Bugünə qədər MEK-in Mübadilə fondundan müxtəlif layihələr çərçivəsində minlərlə kitab sözügedən müəssisələrə təqdim edilib.