“Tom və Cerri”yə baxırmış
Mərkəzi Kəşfiyyat Agentliyi (CİA) 2011-ci ildə öldürülən Əl-Qaidə terror təşkilatının başçısı Usama Bin Ladenin əməliyyat zamanı ələ keçirilən kompüterindəki sənədlərin siyahısını açıqlayıb. Bir vaxtlar ən çox axtarılan terrorçu olan Bin Ladenin kompüterindən 470 min sənəd aşkarlanıb. Həmin sənədlər arasında “Tom və Cerri” cizgi filminin bir çox seriyaları, mobil telefon üçün musiqilər, karikatura və edam videoları da yer alıb. CİA Pakistanın Abbottabad şəhərində gizləndiyi qərargahda öldürülən Bin Ladenin ölümündən bir gün əvvəl bəzi şeylər yazdığı şəxsi dəftərini də ortaya çıxarıb.
10 mindən çox videonun arasında Bin Ladenin oğlu Hamzanın gənclik görüntülərinə də rast gəlinib. CİA direktoru Mike Pompeo “Bu gün Əl-Qaidənin yayımlanan məktubları, videoları, səs yazıları və başqa materiallar Amerika xalqının bu terror təşkilatının iç üzünü anlaması üçün fürsət verir” deyə bildirib. CİA açıqlamasında bəzi sənədlərin milli təhlükəsizlik səbəbindən yayımlanmadığını ifadə edib. Bundan başqa CİA ələ keçirilən və yayımlanmayan sənədlər arasında pornoqrafiq və müəllif hüququ olan materialların da olduğunu qeyd edib. A24.az Türkiyə mediasına istinadən xəbər verir.
