Təhlükənin bir addımlığında iki ticarət mərkəzı
Haqqında yazdığımız və şəkillərdən də gördüyünüz bu ticarət mərkəzləri Nizami rayonu, Q.Qarayev prospekti 2382/87 ünvanda yerləşir. Bir-birinə bitişik olan Elektron Elmi İstehsalat firmasına məxsus ticarət mərkəzi və Sunay ticarət mərkəzi adlanan bu alış-veriş bazarlarına nəzər saldıqda,adi oxucu bəlkə də qeyri-adi heç nəyin olmadığını düşünər. Düşünər ki, alan alır,satan da satır . Əlbəttə kimsə nəyisə satıb qazanc əldə edir, kimsə də ehtiyac duyduğu lazım olan məhsulu alıb evinə aparır. Görünən tərəf budur. Bəs görünməyən tərəflər nədir? Bax elə bu görünməyən tərəfləri qeyd edib əlaqədar təşkilatlara mesaj ötürmək fikrindəyik.
Əvvəla, ticarət mərkəzlərinin elektrik təsərrüfatları standartlara uyğun qurulmayıb. Diqqətlə baxdıqda, mallar arasındakı məsafələrin sıx olduğunu görərik ki, burda qaydalara riayət olunmayıb. Mərkəzlərin elektrik lampalarının qoruyucuları yoxdur. Odsöndürən balonlar kifayət qədər deyil. Anbar otaqları standartlara uyğun gəlmir, ilkin yanğın söndürmə alət və vasitələrdən isə, danışmağa dəyməz.
Zənnimizcə, sadalanan bu faktlar çox ciddi hesab edilməlidir. Çünki, kiçicik bir qığılcımdan yaranan böyük yanğınların neçə-neçə insanın həyatına son qoymasını görməyən, bilməyən az adam tapılar. Belə fəlakətlərə səbəb ola biləcək bütün çatışmazlıqlar zamanında əlaqədar təşkilatların diqqətinə çatdırılmalı, təcili və anındaca təxirəsalınmaz tədbirlər görülməlidir.
Qarşı tərəfin də mövqeyini dərc etməyə hazırıq.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP
