Məktəbli formasının tez-tez dəyişdirilməsinin səbəbi nədir?
Yeni tədris ilindən etibarən yeni məktəbli formalarının tətbiqinə başlanılması gözlənilir. Bu da valideynlərin narazılığına səbəb olub.
Bəs vahid məktəbli formasının tez-tez dəyişdirilməsinin səbəbi nədir?
Məsələ ilə bağlı Azərbaycan Respublikası Elm və Təhsil Nazirliyi yanında İctimai Şuranın üzvü, təhsil üzrə ekspert İlqar Orucov bildirib ki, vahid məktəbli geyimlərinə keçid mütləq şəkildə lazımdır. Onun sözlərinə görə, hazırda insanlar tərəfindən vahid məktəbli formalarına münasibət birmənalı deyil:
-“Əksər valideynlər məktəbli formalarının keyfiyyətsiz, zövqsüz tikilməsindən və şagirdlərin sağlamlığı üçün vacib olan elementlərin gözlənilməməsindən şikayətlənir. Digər tərəfdən hazırda bir çox məktəbin özünəməxsus forması var və bu başa düşüləndir. Amma zövq məsələsi həqiqətən də önəmli faktorlardan biridir. Elə ailələr var ki, üç-dörd uşaq məktəbə gedir. Dörd məktəblini geyimlərlə təmin etmək, əlbəttə ki, ailə büdcəsinə böyük təsir göstərir. Bu gün məktəbli geyimi bazarı əslində xeyli böyük bazardır. Bir çox məktəblər bu prosesdən sui-istifadə edirlər. İstehsalçı şirkətləri məktəbli formasını 45 manata satırsa, məktəb həmin formanı 100-120 manata satır. Bu kimi halların qarşısı alınmalıdır. Düşünürəm ki, hazırkı formalar keyfiyyətsizdir. Elə məhz bu səbəbdən də vahid məktəbli formaları tez-tez dəyişir. Yəqin ki, bunu valideynlər də təsdiq edərlər. Hazırda vahid forma ilə bağlı çatışmazlığın aradan qaldırılması ilə bağlı müzakirələr gedir. Yəni belə bir tələb yoxdur ki, mütləq şəkildə gələn ildən vahid məktəbli formasına bütövlükdə keçid tamam fərqli formatda olsun”.
Təhsil eksperti Elçin Əfəndi isə bildirib ki, vahid məktəbli forması konkret olaraq Nazirlər Kabineti tərəfindən təsdiq olunub. Ekspertin fikirlərinə görə, xüsusi olaraq vahid məktəbli forması hazırlanarkən şagirdlərin yaş psixologiyası, komfortu nəzərə alınmalıdır:
– “Onun əsasında da bu forma müvafiq olaraq hazırlanmalıdır. Demək olar ki, hər il və yaxud da iki ildən bir forma dəyişdirilir. Fikrimcə, bu, doğru yanaşma deyil. Çünki hər dəfə valideynlər övladlarına yeni forma almağa məcbur olurlar. Düşünürəm ki, bu istiqamətdə vahid bir tənzimləmə olmalıdır. Həmin tənzimləmə mütləq şəkildə Nazirlər Kabinetinin qərarına söykənməlidir. Hər yerindən duran işbaz qərarı müvafiq şəkildə dəyişəcəksə, əlbəttə ki, biz hər il bu formanın dəyişilməsini müşahidə edəcəyik. Düşünürəm ki, vahid məktəbli formasının belə tez-tez dəyişilməsi qanunvericiliyin tələbinə ziddir. Əlbəttə, müvafiq özəl məktəblər və liseylər var ki, onların konkret öz geyimləri var. Onlar bu vahid məktəbli formasına qarışmırlar. Amma yenə orda da konkret olaraq hər kəs eyni formadan istifadə edir.
Formanın hər il dəyişilməsi fikrimcə, doğru yanaşma deyil. Geyim formasında seçim imkanları da var. Yay və qış geyim forması mövcuddur. Bunun da hər ikisini valideynlər almalıdırlar. Bu da təbii ki, ailə büdcəsinə sözün həqiqi mənasında kifayət qədər təsir etmiş olur. Təsəvvür edin ki, hər il bunu dəyişəndə ailə büdcəsi nə qədər ziyan çəkmiş olur. Ona görə Elm və Təhsil Nazirliyi konkret bu istiqamətdə yekun bir qərar verməlidir”.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP