Fövqəladə Hallar Nazirliyinin Dövlət Yanğın Nəzarəti Xidməti ölkədə yanğın təhlükəsizliyinin təmin olunması istiqamətində üzərinə düşən vəzifələrinin icrasını həmişə olduğu kimi bu gün də davam etdirir.

Təəssüf ki, yanğın təhlükəsizliyi haqqında çox yazılıb, çox deyilsə də, yenə eyni səhvlər təkrarlanır. Bu da yanğınlar, digər fəlakətlər törədir. Nəticə isə, çox acınacaqlı olur.

İstər adi vətəndaş, istərsə də sahibkar bilməlidir ki, yanğın təhlükəsizliyi qaydalarına biganəlik həyat üçün olduqca təhlükəlidir. Hər kəs bilməlidir ki, yanğın şəxsi və dövlət əmlakına külli-miqdarda ziyan vurur, illərlə qazanılan əmlak bir andaca məhv olur. Ən dəyərlisi  insan həyatıdır ki, qaydalara əməl olunmaması insanların həyatını itirməsi ilə nəticələnə bilər.

Gəncə şəhəri, Ü.Hacıbəyov küçəsində yeni inşa olunan uşaq evində də təhlükəsizlik qaydaları kobud şəkildə pozulub.  Məlum olub ki, burada yanğın təhlükəsizlik baxımından layihə ekspertizası həyata keçirilməyib. Tikinti meydançasının ərazisi ilkin yanğınsöndürmə vasitələri, o cümlədən su təchizatı ilə təmin olunmayıb. İnşaat işləri bu qayda pozuntuları ilə həyata keçirilir. Bu da  gələcəkdə yanğın hadisələrinin baş verməsinə və digər  problemlərin yaranmasına əsas verir.

Obyektin inşasına cavabdeh şəxslər yanğın təhlükəsizliyi tələblərinə təcili ciddi əməl etməsə, fəsadların ağır olacağı qaçılmazdır.

Yanğın təhlükəsizliyi ilə bağlı nəzarət tədbirlərinin gücləndirilməsinin vacibliyini aidiyyəti dövlət qurumlarının diqqətinə çatdırırıq.

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin:    0 55 4 61 71 21 WHATSAPP