Noyabrın 11-də Beynəlxalq Muğam Mərkəzində şəhid, qazi, həmçinin müharibə iştirakçılarının şeir və esselərinin toplandığı “İgidlərin sözü” antologiyasının təqdimatı keçiriləcək.
Beynəlxalq Muğam Mərkəzinin mətbuat xidmətindən bildirilib ki, Mədəniyyət Nazirliyinin dəstəyi və şairə Nigar Həsənzadənin təşəbbüsü ilə həyata keçirilən “Söz” ədəbi layihəsinin nəşri olan antologiya 2021-ci ildə çapdan çıxıb. Kitabın ideya müəllifi Nigar Həsənzadə, redaktoru Aida Eyvazlı Göytürkdür.
Antologiyada Aprel şəhidləri və II Qarabağ müharibəsi şəhidləri, həmçinin Vətən müharibəsi iştirakçılarının bədii nümunələri yer alıb.
Qeyd edək ki, “İgidlərin sözü” ədəbi layihəsinin təqdimatı 2021-ci ilin noyabrında BMM-də gerçəkləşib. Layihənin bu il iyulun 14-15-də Şuşada keçirilən Vaqif Poeziya Günlərində də təqdimatı olub. Bu təşəbbüsün həyata keçirilməsində məqsəd ölkəmizin ərazi bütövlüyü uğrunda mübarizə aparmış igid oğulların bədii yaradıcılıq nümunələrini ictimaiyyətə təqdim etməkdir.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP
