Kataloniyanın müstəqilliyini təxirə saldığını deyən Karlos Puçdemonun bəyanatı birmənalı qarşılanmayıb. O, İspaniya hökuməti ilə dialoq aparmağın vacibliyini vurğulayıb. Ötən gecə isə, Puçdemon, müavini, parlamentin spikeri və 72 deputat Kataloniyanın müstəqilliyi haqqında bəyannaməni imzalayıb.
Xarici KİV-lər xəbər verir ki, dialoq mesajına baxmayaraq, Madrid yenə öz sərt mövqeyində qalır: “Kataloniya rəhbərliyi qanun çərçivəsinə qayıtmayınca, heç bir danışıq olmayacaq”.
Müstəqilliyini elan edən katalonlar nə qazanacaq sualına baş nazirin müavini Sorayya Saens de Santamariya belə cavab verib: “İspaniya unitar dövlətdir, onun konstitusiyası regionların öz müqəddəratını təyin etməsini nəzərdə tutmur. Kataloniyanın ayrılmaq üçün göstərdiyi hər hansı cəhd separatçılıq təzahürü, Madridə itaətsizlik və ölkənin əsas qanununun pozulması kimi qiymətləndiriləcək”. Onun sözlərinə görə, əgər muxtar region konstitusiya və digər qanunlarla üzərinə düşən məsuliyyəti yerinə yetirməzsə, hökumət Senatın razılığı ilə muxtariyyətin fəaliyyətini dayandıra və regional administrasiyanın bütün orqanlarını mərkəzi tabeçiliyə verə bilər.
Belə olarsa,Karles Puçdemonu və müstəqillik uğrunda hərəkatın liderlərini dövlətə qarşı qiyama görə həbs gözləyir.
