“Azərbaycan dövləti üçün yeni idarəçilik və iqtisadi mərhələ başlayır”
Prezident İlham Əliyevin mayın 4-də Şərqi Zəngəzur iqtisadi rayonuna daxil olan Zəngilan rayonuna prezidentin xüsusi nümayəndəsinin təyin olunması ilə bağlı açıqlama verən “Bakı Xəbər” qəzetinin baş redaktoru Aydın Quliyev bildirib ki, ölkə prezidentinin Zəngəzur iqtisadi rayonuna təyin olunmuş xüsusi nümayəndə ilə söhbətini və ona tövsiyələrini müstəqil Azərbaycan dövləti adından Şərqi Zəngəzur adı altında qruplaşmış Azərbaycan bölgələrinin inkişafı naminə verilən ilk tövsiyə və tapşırıqlar kimi dəyərləndirmək olar. Çünki işğaldan azad olunmuş və Şərqi Zəngəzur iqtisadi rayonuna daxil olan rayonlarda Azərbaycan dövlətinin adından ilk dəfə olaraq sosial, iqtisadi, proqramların həyata keçirilməsi prosesinə başlanılır:
” Bu mənada Şərqi Zəngəzur iqtisadi zonasının xüsusi nümayəndəsinə verilən tapşırıqların həm cari taktiki, həm də strateji əhəmiyyəti var. Cari taktiki nöqteyi- nəzərdən yanaşsaq, onun qarşısında qoyulan vəzifələrin ən yaxın dövrlərdə icra olunması, yerinə yetirilməsi, sözsüz ki, həmin bölgələrin inkişafında öz təsirlərini göstərəcək. Əks halda biz sadəcə illəri itirmiş ola bilərik. İkincisi unutmayaq ki, Şərqi Zəngəzur iqtisadi rayonuna ilk dəfə olaraq Azərbaycan dövlətinin adından xüsusi nümayəndə təyin olunur və həmin xüsusi nümayəndənin öz vəzifəsinin səlahiyyətlərinin öhdəsindən hansı səviyyədə gəlməsi artıq gələcəkdə bu bölgədə görüləcək işlərin bir növ təməlini yaradacaq. Daha dəqiq desək, Şərqi Zəngəzur iqtisadi rayonuna daxil olan Şərqi Zəngəzur bölgəsinin ilk xüsusi nümayəndəsinin görəcəyi işlər gələcəkdə bu regionda növbəti xüsusi nümayəndələrin görəcəyi işlər üçün olduqca böyük əhəmiyyət kəsb edir. Prezident əslində xüsusi nümayəndənin bu bölgədə, xüsusilə iqtisadi sahədə görəcəyi işlərin çərçivəsini təqdim etdi. Azərbaycanın bu bölgələrinin iqtisadi xüsusiyyətlərinin öyrənilməsi ən qabarıq təzahürlərini özündə əks etdirir. Hər kəs bilir ki, Azərbaycanın bu bölgələri həm heyvandarlıq, maldarlıq, həm də əkinçilik üçün nisbətən əlverişli bölgələrdir. Bu bölgələrdə xüsusilə də, heyvandarlığın və maldarlığın inkişaf etdirilməsi ölkənin aqrar sektoruna əlavə tövhələr və qatqılar verə bilər. Bu nöqteyi- nəzərdən həmin rayonların maldarlıq və heyvandarlıq potensiallarının lazımi səviyyədə üzə çıxarılması, prezidentin də dediyi kimi xüsusi nümayəndənin qarşısında duran böyük vəzifələrdən biridir. Təbii ki, ölkəmizin iqtisadi inkişafında öz izlərini göstərəcək. Bundan başqa xüsusi nümayəndənin qarşısında qoyulan 30 illik işğal dövründə Ermənistanın həmin bölgələrdə məhv etdiyi bizim təbii ehtiyatlarımız və ekologiyamıza vurduğu ziyanların hesablanması üçün lazımi addımların atılması da olduqca əhəmiyyətlidir. Ona görə ki, Azərbaycanın beynəlxalq hüquq instansiyaları qarşısında Ermənistana və Ermənistanın bayrağı altında 30 illik dövrdə bizim təbii ehtiyatlarımızı istismar etmiş müəyyən beynəlxalq şirkətlərə qarşı iddia işlərinin qaldırılması olduqca əhəmiyyətlidir və bu iddia işlərinin nə qədər tutarlı olacağı ilk növbədə xüsusi nümayəndənin həmin bölgələrdə bu istiqamətdə görəcəyi işlərdən asılı olacaq. Yəni beynəlxalq şirkətlərin erməni təcavüzkarlarının bizim ölkəmizin həmin hissəsinin təbii ehtiyatlarına, ekologiyasına vurduğu ziyanların nə qədər dəqiq hesablanması Azərbaycan dövlətinin xeyrindədir. Təbii ki, təcavüzkar dövlətə və beynəlxalq şirkətlərə qarşı qaldıracağımız kompensasiya iddialarının əsasını təşkil edəcək. Bu mənada xüsusi nümayəndənin fəaliyyəti həm həmin bölgələrdə ölkəmizin aqrar sektorunun inkişafında yeni bir mərhələ aça bilər, həm də beynəlxalq instansiyalar qarşısında Ermənistana qarşı kompensasiya davalarının açılması üçün yerlərdə lazım olan işlərin görülməsində böyük əhəmiyyət daşıyır. Bu strateji əhəmiyyətli təyinatdır. Bu həm də ölkədə yerli icra hakimiyyəti sistemlərinin dəyişdirilməsinə dəlalət edir, ona görə ki, artıq ölkəmiz icra hakimiyyəti sistemindən xüsusi nümayəndəliklər idarəetmə sisteminə keçid mərhələsindədir. Bu mərhələnin nə qədər uğurlu olacağı, vəzifəyə təyin olunmuş xüsusi nümayəndənin fəaliyyətindən müəyyən qədər asılı olacaq. Ona görə ki, xüsusi nümayəndə həm xüsusi nümayəndəlik institutunun bu sahədə özünü necə doğruldacağı mənasında məsuliyyət daşıyır, həm də bir neçə il bu vəzifədə işləyəcəyi dövrdə həmin bölgənin, xüsusilə də aqrar sektorun inkişafında verə biləcəyi töhvələr üçün məsuliyyət daşıyır. Hər halda Azərbaycan dövləti üçün yeni idarəçilik və iqtisadi mərhələ başlayır”.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP