Şuşanın məscidləri Əlcəzair portalında
Əlcəzairin “Əl Hərir” portalında “Şuşanın məscidləri” sərlövhəli fotoreportaj yayımlanıb.
AZƏRTAC xəbər verir ki, materialda 1769-cu ildə Şuşada “Meydan” adlanan yerdə Qarabağ hakimi İbrahimxəlil xan Cavanşir tərəfindən ilk Böyük Cümə məscidinin tikildiyi, lakin XIX əsrin 60-cı illərində dövrün tələblərinə cavab vermədiyinə görə Gövhər ağa Cavanşirin vəqf üçün ayırdığı mülklərdən əldə edilən gəlir hesabına memar Kərbəlayi Səfixan Qarabağinin layihəsi və nəqqaş Mir Möhsün Nəvvabın iştirakı ilə onun əsaslı şəkildə bərpa olunduğu diqqətə çatdırılıb. Qeyd olunub ki, məscidin giriş qapısının üzərindəki daşa – sağ və sol divarlarına Gövhər ağanın vəsiyyətnaməsi yazılıb və həmin vaxtdan Cümə məscidi el arasında “Yuxarı Gövhər ağa məscidi” adlanıb. Sonradan onun yaxınlığında ikinci məscid də tikilib.
Fotoreportajda XIX əsrdə memar Kərbəlayi Səfixan Qarabağinin layihəsi ilə inşa edilən Saatlı məscidi, Hacı Yusifli məscidi, Şuşanın Mamayı məhəlləsində tikilmiş ikimərtəbəli məhəllə məscidi haqqında da məlumat yer alıb.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP