“Neyt” qasırğası ABŞ-ın enerji sektoruna daha böyük zərbə vuracaq

“Neyt” qasırğası ilə əlaqədar Meksika Körfəzindəki neft və qaz istehsal edən platformalardakı heyətin 40 faizindən çoxu evakuasiya edilib.

AZƏRTAC xəbər verir ki, bu barədə ABŞ Daxili İşlər Nazirliyinin Təhlükəsizlik və Ətraf Mühitin Mühafizəsi İdarəsi (BSEE) məlumat yayıb. Bildirilir ki, bölgədə 1 milyon 615 min barrel həcmində olan gündəlik neft istehsalının 92 faizi və sutkada 70 milyon 220 milyon kubmetrlik təbii qaz hasilatının isə 77 faizi dayandırılıb.

Qasırğa səbəbindən ABŞ Sahil Mühafizə qurumunun əmri ilə Luizianadan Floridaya qədər olan bölgədəki bütün limanlar bağlanacaq.

Milli Qasırğa Mərkəzindən edilən şərhdə qeyd edilir ki, “Neyt” qasırğasının ABŞ sahillərinə çatdığında küləyin sürəti saatda 154-177 kilometrə çatacaq və fəsadları böyük ola bilər. “Neyt” qasırğası ötən ay Meksikanın Körfəzində tüğyan edən “Harvi” qasırğasından üç dəfə daha çox şiddətli olacaq.