Dünya Ərzaq Proqramı Efiopiyada aclıq fəlakəti ilə bağlı xəbərdarlıq edib

BMT-nin Dünya Ərzaq Proqramı (WFP) qarşıdakı 6 ayda Efiopiyada, xüsusən Tiqray regionunda 5,2 milyon insanın aclıq fəlakəti ilə qarşı-qarşıya qalması ilə bağlı xəbərdarlıq bəyanatı yayıb.

Təşkilat beynəlxalq ictimaiyyətə müraciətində fəlakətin qarşısını almaq məqsədilə 426 milyon dollar məbləğində vəsaitə ehtiyac olduğunu bildirib.

Efiopiyada ərzaq qıtlığı ötən ilin noyabrında ölkənin şimalında yerləşən Tiqray regionunda başlayan silahlı münaqişə və bunun nəticəsində yüz minlərlə insanın evlərindən didərgin salınmasından sonra başlayıb. Belə ki, on minlərlə fermer öz torpaqlarını ataraq qonşu Sudana qaçıb, həmçinin quraqlıq nəticəsində ölkənin daha iki rayonunda – Afar və Amharada aclıq başlayıb.

WFP-nin məlumatına görə, hazırda Efiopiyanın bütün ərazisində 13,6 milyon insan ərzaq qıtlığından əziyyət çəkir. Son aylar bu ölkədə COVID-19 pandemiyası ilə bağlı vəziyyət də pisləşib. Proqramın Şərqi Afrika üzrə regional direktoru Maykl Danford jurnalistlərə müsahibəsində qeyd edib ki, artıq WFP-nin Efiopiyada humanitar fəlakətin qarşısını almaq üçün yetərli maliyyə vəsaiti qalmayıb. O əlavə edib ki, humanitar fəlakət zonasında 4 milyon insana göstərilən ərzaq yardımı dayandırılır.

Maraqlı xəbərləri Mediazona.az Facebook səhifəmizdən izləyin.
———————————————————————————————————————————————
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin 055 461 71 21 WHATSAPP