DYP: Bu ilin birinci rübündə yol qəzalarında 125 nəfər ölüb, 370 nəfər isə müxtəlif dərəcəli bədən xəsarəti alıb
2021-ci ilin 3 ayı ərzində respublika ərazisində ölüm və xəsarətlə nəticələnən 376 yol-nəqliyyat hadisəsi qeydə alınıb.
Daxili İşlər Nazirliyinin mətbuat xidmətindən verilən məlumata görə, bu qəzalarda 125 nəfər ölüb, 370 nəfər isə müxtəlif dərəcəli bədən xəsarəti alıb. Ötən ilin müvafiq dövrü ilə müqayisədə hadisələrin sayı 45 (-10,7 faiz) fakt, ölənlərin sayı 56 (-30,9 faiz) nəfər, yaralananların sayı isə 8 (-2,1 faiz) nəfər azalıb.
Aparılmış təhlillər göstərir ki, 365 (97 faiz) yol-nəqliyyat hadisəsi məhz sürücülər tərəfindən (piyadalar tərəfindən 9 – 2,4 faiz) yol hərəkəti qaydalarının pozulması nəticəsində baş verib. Bu qayda pozuntularının 43,2 faizi, yəni 158-i sürücülər tərəfindən nəqliyyat vasitələrinin yüksək sürətlə idarə edilməsi, 29,8 faizi isə, yəni 109-u qarşıdan gələn nəqliyyatın hərəkət zolağına çıxma və ötmə qaydalarının pozulması olub.
Yol-nəqliyyat hadisələrin növləri içərisində piyadanı vurmaq (142 – 37,7 faiz, 49 ölü, 99 yaralı) və toqquşma (136 – 36,1 faiz, 35 ölü, 179 yaralı) yenə də üstünlük təşkil edir.
Həlak olan 125 nəfərdən (qadınlar 20 nəfər, 7-16 yaş 7 nəfər) 50-si piyada, 42-si sürücü, 29-u sərnişin, 3-ü isə velosipedçi olub.
Maraqlı xəbərləri Mediazona.az Facebook səhifəmizdən izləyin.
———————————————————————————————————————————————
DİQQƏT! Şikayət və təklifləriniz, gördüyünüz ve eşitdiyiniz hər hansı bir maraqlı məlumatı bu nömrəyə göndərin 055 461 71 21 WHATSAPP