“Hörmətli sürücülər, Bakıya yağış yağmaq istəyir, amma hələ ki, gur yağıntı yoxdur, əksər yerlərdə sadəcə yolun səthi islanıb. Bu vəziyyət çox ciddi bir təhlükəni gizlədir”.
Milli.Az xəbər verir ki, bunu yol-nəqliyyat məsələləri üzrə tanınmış ekspert Ərşad Hüseynov bildirib.
Onun sözlərinə görə, uzun müddət quraqlıqdan sonra belə çiskin asfalt üstündəki tozu isladır və çox sürüşkən bir təbəqə əmələ gəlir. Bu təbəqənin sürüşkənliyi bəzən qardakı kimi ola bilər:
“Nə qədər ki, gur yağıb o sürüşkən təbəqəni yoldan yumayıb, diqqətli olun, sərt manevr etməyin, sürəti aşağı salın, ara məsafəsini bir az da artırın. Günortayadək təxminən 1 saat müddətində şəhərin küçələri ilə hərəkət etmişəm, 4 dənə yol-nəqliyyat hadisəsi gördüm. İkisi Z. Bünyadov prospektində idi. Şükür ki, hamısı sadəcə maddi ziyanlı qəzalar idi. Dördündə də arxadan vurulma gördüm”.
