“Ölkə.Az” xəbər verir ki, Moskvada yetərincə insan axını olan “Metropolis”, “Atrium” və “Avropa” adlı ticarət mərkəzlərində əməliyyat keçirilib. Əməliyyat polisə daxil olan anonim zəng səbəbindən baş tutub.

Anonim zəng edən şəxs həmin ticarət mərkəzlərinə partlayıcıların qoyulması və güclü partlayış olacağı barədə xəbər verib. Daxil olan zəngdən sonra əraziyə xilasedicilər, hüquq-mühafizə orqanlarının əməkdaşları və tibb işçiləri cəlb edilib. Əməliyyat zamanı 3 minə yaxın insan evakuasiya edilib. Əməliyyat zamanı heç bir partlayıcı maddə aşkar olunmayıb.

Qeyd edək ki, dünən  səhər saatlarında Moskvada oxşar hadisə baş verib. Hüquq-mühafizə orqanlarına daxil olan zəngə əsasən, paytaxtın mərkəzindəki iki restoran və gecə klubunda təhlükəsizlik tədbirləri görülüb. Tədbirlər çərçivəsində 200 insan evakuasiya edilib.

Xatırladaq ki, sentyabrın 13-dən başlayaraq Moskva şəhərində hər gün terror olacağı barədə xəbərlər verilir. Anonim xəbərlərdə yalandan partlayıcı maddələrin qoyulması bildirilir. Bu səbəbdən indiyə qədər 150 minə yaxın insan evakuasiya edilib. Ümumilikdə 420 obyektdə yoxlama işləri aparılıb. Sentyabrın 16-da da Rusiya polisi gərgin iş rejimində çalışıb. Bu gün hüquq-mühafizə orqanlarına gecə klublarından birinə və kinoteatra bomba qoyulması barədə anonim zəng daxil olub.

Daxil olan zəngdən sonra “Zvezda” kinoteatrı evakuasiya edilib. Partlayış təhlükəsi səbəbindən 150 nəfər binadan təxliyyə edilib.

Bundan başqa, paytaxtdakı 3 gecə klubundakı insanlar evakuasiya edilib. Təxliyyə edilənlərin sayı 200 nəfərdən çox olub.