Cahangir Məmmədli: Kasıbların bankomat kartlarını özlərinə qaytarın
Dilimizdə vaxtla bağlı bir neçə müqəddəs anlayış var: azan vaxtı, iftar vaxtı, namaz vaxtı və s. Bu sıraya çox vacib birini də əlavə etmək olar: tövbə vaxtı. Sıranın əvvəlindəki bütün vaxtlar hamı üçün eyni zamana düşür. “Tövbə vaxtı”nı isə tövbəyə ehtiyacı olan hər kəs özü seçir. Amma bir “tövbə vaxtı” da var. Onu Tanrı özü göndərir. Belə bir vaxt, adətən, ümumibəşəri faciələr zamanına düşür. Bu gün biz ümumibəşəri faciə anındayıq. Bu faciəni dəf etmək üçün bütün dünya dövlətləri, o cümlədən bizim dövlətimiz tədbirlər görməkdədir. Azərbaycan xalqının dövlətə, millətə bu qədər bağlılığını indi- Prezidentin koronavirusu dəf etmək üçün ianə təşəbbüsü zamanı daha aydın gördük. Dövlət, xalq, millət heç yerdə olmayan birgəliyi bizdə göstərdi. Təmiz sahibkarlar, namuslu iş adamları ləyaqətlə qazandığı vəsaitdən məlum mübarizə fonduna bol-bol pay köçürtdü. Onların hamısını xalqın duası hər cür çətinlikdən xilas edəcək.
Amma bu xalqın içərisində tövbəyə ehtiyacı olanlar da az deyil. Mən ilk növbədə oliqarxlara üzümü tuturam: Yığdığınız çirkli pullardan dolayı Tanrıdan tövbə diləyin. İndiki çətin zamanda o çirkli pulları təmizləməyin min bir yolu var. O yollardan birini seçin! Mən üzümü Neftçalanın dünənki başçısına bənzər icra başçılarına tuturam: Kasıbların bankomat kartlarını özlərinə qaytarın! Mən üzümü tələbəsindən rüşvət tələb edən müəllimə tuturam: “Hər şeyin axırı bir metrlik qəbirdir” həqiqətini unutmayın! Mən üzümü layiq olmadığı vəzifəyə rüşvət gücü ilə təpilən məmura tuturam: tövbə elə, yoxsa sən də bir gün gördüklərimizin gününə düşəcəksən. Mən üzümü ağır günah sahiblərinin hamısına tuturam: Bəşəriyyətin üzləşdiyi bəla anı həm də tövbə anıdır. Tövbədən çəkinməyin, Allah bağışlayandır…
Maraqlı xəbərləri Mediazona.az Facebook səhifəmizdən izləyin.