Millət vəkili Rafael Cəbrayılovun külli miqdarda borcunun yaranması haqda iddialar səngimək bilmir.
Bu barədə Rafael Cəbrayılovdan şikayətçi olanlardan adının açıqlanmasını istəməyən şikayətçi bildirib ki, millət vəkilinin qardaşı Elşən Cəbrayılov Türkiyənin İstanbul şəhərində Bəylikdüzü adlanan ərazidə hündürmərtəbəli binalar tikir.
Məlumatda deyilir ki, tikinti biznesinə yatırılan pullar Azərbaycandan ayrı-ayrı vətəndaşlardan alınan borclar və banklardan götürülən kreditlərdir. Elşən Cəbrayılovun Türkiyədə işlərinin necə getdiyi barədə dəqiq məlumat yoxdur. Lakin iddialara görə, Rafael Cəbrayılov borclularla danışarkən qardaşını ittiham edirmiş. Bildirimiş ki, bu oyunları onun başına qardaşı açıb.
Rafael Cəbrayılovla bağlı borc qalmaqalı bir həftədən artıqdır davam edir.
Xatırladaq ki, Rafael Cəbrayılov ayrı-ayrı vətəndaşlardan toplam 840 min ABŞ dolları (Təranə Fətəliyeva 300 min, Xatirə Nəcəfova 300 min, Yusif Orucov 240 min) məbləğində pul alıb. Bu pullar deputata Binəqədidə inşa etdiyi binalardan mənzil alınması üçün verilib. Lakin indiyə həmin şəxslərə nə mənzil verilib, nə də pulları geri qaytarılıb. Rafael Cəbrayılovu ictimai hədəfə gətirən təkcə külli miqdarda borcu olması deyil. Məsələ burasındadır ki, o, bu pulları qaytaracağına əminlik yaratmaq III və IV çağırış deputat vəsiqələrini girov qoyub.MediaZona.Az
