Dmitri Medvedev: “Ayı saxlamaq olmaz”
Rusiyanın baş naziri Dmitri Medvedevin imzaladığı qərara görə, ölkə sakinləri daha evdə bir çox heyvanları saxlaya bilməyəcək. Bunların arasında ayı, şir, pələng, canavar, meymun və gürzə də var.
Qərarda müəyyən istisnalar nəzərdə tutulub. Birincisi, 2020-ci il yanvarın 1-nə qədər alınan heyvanıları evdə saxlamağa icazə verilir. İkincisi, heyvanları müalicə üçün saxlamaq qadağan deyil.
Qərarda yazılıb ki, iri yırtıcılar və zəhərli heyvanlar insanlara təhlükə yaradır. Bundan başqa, onların saxlanıldığı şərait təbii mühitdən fərqlənir. Heyvanların səhhəti ilə bağlı narahatlıq da ifadə olunub.
Ümumiyyətlə, qadağa siyahısında çox heyvan növünün adı var. Porsuqlar, kaftarlar, berber meymunları, mambalar, komod kərtənkələsi, kayman tısbağası da siyahıya düşüb. Quşlardan pinqvinlər, kivilər, şahinlər, bayquşlar, dəvəquşular insanlarla birlikdə yaşaya bilməyəcək. Balıqların bəzisini də saxlamaq olmaz.
Qərar heyvanxanalara, sirklərə, delfinariumlara, okeanariumlara aid deyil.MediaZona.Az