Media etikası barədə kitab yazanlar adətən o kitabın ilk səhifəsində belə bir cümlə yazırlar: “Kitab jurnalistlərə ünvanlanır”. Və istər istəməz sual yaranır ki, hansı jurnalistlərə, hər yazı yazan jurnalist sayılırmı, hər media orqanı açan jurnalistikanın prinsiplərini bilirmi?  Cavab çox sadədir – etik normalara yiyələnmək o adamlara lazımdır ki, onlar bilərəkdən yalan danışmır, uydurmalardan uzaq durur və məsuliyyətli olmaqdan yorulmur.

Bu gün Azərbaycan jurnalistikasında bəzən etik çərçivə sisteminə qətiyyən uyğun gəlməyən məqamlarla üzləşirik. Bu xüsusilə jurnalistika və dövlət qurumları münasibətlərində özünü göstərir. Bəzən jurnalistlər elə düşünürlər ki, onların işi yeri gəldi-gəlmədi dövlət qurumunu tənqid etmək, onun işində qüsur axtarmaqdır. Məsələyə məhz bu aspektdən yanaşmağımız bu günlərdə üzləşdiyimiz bir faktla daha çox bağlıdı.

Həmyerlimiz Elçin Xəlilovun ABŞ-da öldürülməsi xəbərindən sarsıldıq. Hadisənin baş verdiyi andan bütün müvafiq dövlət qurumlarlı məsələyə həssas yanaşıb. Soydaşımızın cənazəsinin Azərbaycana gətirilməsi üçün Diasporla İş üzrə Dövlət Komitəsi, onun nəzdindəki Azərbaycan Diasporuna Dəstək Fondu  bütün imkanlarını səfərbər etdi. Cənazə Bakıya gətirildi, Komitə əməkdaşları hüzr mərasiminə qatıldılar və s. Üstəlik etik çərçivələrdə davranaraq bu informasiyalar ictimailəşdirilmədi.

Bəzi media orqanları isə belə həssas məqamda da uydurmaya yol verməyə, Dövlət Komitəsini ittiham etməyə, onun bəzi addımlarına şübhəli yanaşmağa başladı. Komitənin son aylardakı uğurları, xaricdə yaşayan hər bir azərbaycanlıya diqqət etməsi fonunda görülən işlərə kölgə salınmasına hesablanan bu addım jurnalistikanın nüfuzuna xələl gətirməkdən başqa bir şey deyil.

Əgər mətbuat faciəli şəkildə dünyasını dəyişən gənc həmyerlimizlə bağlı xəbəri belə  dövlət orqanlarını tənqid etmək müstəvisinə daşıyırsa, burada etik davranışdan və ya peşəkarlıqdan danışmaq yersizdi. Deməli, qabaqcıl ölkələrdə oturuşmuş etik çərçivə sisteminin Azərbaycana da gəlməsinə böyük ehtiyac vardır. MediaZona.Az