Bir neçə gün əvvəl AMEA Fəlsəfə və Hüquq İnstitutunun keçmiş şöbə müdiri, hüquq elmləri üzrə fəlsəfə doktoru Xaliq Əhmədzadə həbs edilib. Zaman-zaman mətbuatda fəlsəfə institutunun direktoru İlham Məmmədzadə  və Xaliq Əhmədzadə arasındakı qalmqallarla bağlı yazılar dərc edilirdi.

Qeyd edilirdi ki, institutda iki hakimiyyətlilikdir, idarəçilik tamamilə iflic vəziyyətindədir, kadrlar düzgün yerləşdirilmir, xəfiyyə sistemi yaradılıb və buna hüquqşünas Xaliq Əhmədzadə rəhbərlik edir.

Məsələ ilə bağlı AMEA Fəlsəfə İnstitutunun direktoru İlham Məmmədzadənin mövqeyini öyrənib. O bildirib ki, Xaliq Əhmədzadə institutda heç zaman şöbə müdiri olmayıb:

“Əvvəlcə qeyd etməliyəm ki, Xaliq Əhmədzadə yanvar ayından etibarən bizim institutda işləmir. Həmin vaxt Fəlsəfə və Hüquq İnstitunun yerinə iki institut formalaşdırmağı düşünürdük. Biri fəlsəfə, digəri hüquq ilə məşğul olacaqdı. Xaliq Əhmədzadə hüquqşünas olduğu üçün ona təklif edildi ki, institutlar arasında seçim etsin. O, təklifi rədd etdi və faktiki olaraq işdən azad olundu. Eyni zamanda, Xaliq Əhmədzadə heç zaman şöbə müdiri olmayıb”.

İ.Məmmədzadə qeyd edib ki, Xaliq Əhmədzadənin həbs qərarını gözləmirdi:

“Bilirsiniz, Xaliq Əhmədzadə ilə mətbuatda yayımlanan qalmaqalda uydurmalar daha çox idi, nəinki reallığı əks etdirən xəbərlər. Əvvəllər Xaliq Əhmədzadə çox fəal idi, elmi işlə məşğul olurdu. Amma doktorluq işinə hələ hazır deyildi. Xasiyyətcə zəif tərəfləri mövcud idi. Özündən tez çıxırdı. Bəlkə də tolerantlığı, dözümlülüyü  az idi. İnsanlarla o qədər də yaxşı rəftar etmirdi. Həbs səbəbi ilə bağlı dəqiq məlumatım yoxdur. Çünki bu şəxs 8 aydır institutda işləmir. Düzdür, əvvəllər instituta gəlib işini bərpa etmək istəyirdi. Bunlara baxmayaraq Xaliq Əhmədzadənin həbs qərarını gözləmirdim”.

Qeyd edək ki, AMEA-nın keçmiş əməkdaşı Xaliq Əhmədzadə dələduzluqda ittiham olunur və onun barəsində Nəsimi Rayon Məhkəməsi tərəfindən 4 aylıq həbs qətimkan tədbiri seçilib. Modern.az